Covid-19: Mizoram dinhmun Hri vei dam tawh 183 chhuak

Nimin khan Covid-19 vei dam tawh, mi 183 an chhuak a, chungte chu - State Referral Hospital aṭangin mi 17, Thingsulthliaha JNV CCC aṭangin 73, Venghnuai community CCC aṭangin 17, Tribal Art Centre CCC aṭangin 15, Zokhawsang CCC aṭangin 14, Serchhip Nursing School CCC aṭangin 37, Lunglei Pukpui CCC aṭangin pali, Thingdawl CCC aṭangin pahnih leh Saitual CCC aṭangin mi pali an ni. September 24-a chhuahtir, nimina Vanglainia tarlan hman loh mi paruk an awm a, ITI CCC aṭanga chhuak pali leh Darlawn CCC aṭanga chhuak pahnih an ni.

Covid-19 vei Ningania hmuh chhuahte chu - ZMC laboratory-a hmuh chhuah mi 23, Kolasib Civil Hospital leh Mamit District Hospital laboratory-a hmuh chhuah mi pakhat ve ve leh, Rapid Antigen Test hmanga Aizawl district-a hmuh chhuah mi pakhat an ni a; mipa 23 leh hmeichhia pathum niin, Covid-19 symptom nei an awm lo.

Mizorama Covid-19 vei hmuh chhuah tawh mi 1,786-te chu mipa 1,456 leh hmeichhia 330 an ni a; an zinga mi 1,288 (72.16%) chu chhuahtir tawh an nih laiin, enkawlna hmunah mi 498 (27.84%) an la awm. La chhuak lo zingah hripui vei tawh lo an awm nual bawk.

September 24-a ZMC laboratory-a Covid-19 vei hmuh chhuah mi 23-te chu mipa 20 leh hmeichhia pathum an ni a, September 17-a swab sample lâk zinga mi 18 leh September 18-a sample lâk zinga mi panga an ni. Mi 23 zingah hian Mizoram chhunga kái chhâwng, September 17-a sample lâk zinga mi pasarih an tel.

Hripui vei ZMC-a hmuh tharte chu - Chanmari veng mi pali, Chaltlang, Chawnpui leh Tuithiang mi pakhat ṭheuh, state páwn aṭanga rawn lut, quarantine facility-a awm lai mi 11 leh, Assam Rifles mi, Zokhawsang quarantine centre-a awm mek mi panga an ni a; Covid-19 symptom nei an awm lo.

Ningani vêka TrueNAT-PCR hmanga Kolasib District Hospital laboratory-a Covid-19 positive hmuh chhuah chu mipa puitling, tun hnaia Silchar aṭanga rawn haw, quarantine facility-a awm lai a ni a; Mamit District Hospital lab.-a hmuh chhuah chu hnam dang mipa, tun hnaia Tezpur aṭanga rawn lut, quarantine facility-a awm mek a ni.

RAT hmanga Aizawl district-a hripui vei hmuh chhuah chu mipa kum 62-a upa, Pawan Hans helicopter khalhtu a ni a, Kolkata aṭanga Lengpui Airport a thlenin RAT hmanga lo endik nghal a ni.

September 24 khan Mizoramah mi 2,143-te swab sample endik a ni a; ZMC laboratory-ah sample 1,306 endik niin, TrueNAT-PCR hmangin district district dang pariatah sample 145 leh RAT hmangin district parukah sample 692 endik a ni bawk.