Gaga hnenah hla phuahthiam chawimawina

Zai lamah a thawm a reh rih viau nain hla phuah lamah chuan a thawm a reh vak lo. Lady Gaga hi hla phuahthiamte chawimawina, Song­writers Hall of Fame-ah lakluh a ni dawn.

June 19 khian Manhat­tan-a Marriott Marquis-ah 46th Songwriters Hall of Fame-a lakluh inkhawmah Lady Gaga hi Contemporary Icon Award hlan a ni dawn a, he chawimawina an hlan hmasak ber tur a ni.

Hall of Fame-a an president leh CEO, Linda Moran chuan, "Tuna chawimawina award kan siam hi, kan siam laiin kan rilruah Lady Gaga a awm nghal a ni ti ila kan sawi sual lo ang," a ti.