IR post nghet siam vat turin CM ngen

MZP Gen.Hqrs hruaitute chuan nimin khan chief minister Zoramthanga chu a pisaah an hmu a; Vairengte auto stand thlang Mizo IR duty mekna chu police post puitling siam tur leh, Saihapui-V Village Task Force venbûk, Assam police-te'n an luah mek hmunah IR post nghet siam turin an ngen.

MZP hruaitute chuan, October 17, 2020-a Assam police-te leh civil mite'n Saihapui-V VTF-in Covid-19 laka invenna atana vènbûk an sak tichhia a, Assam police-in an luah zui chu rang taka nawr chhuak tur leh, chu hmunah chuan Mizo IR police camp nghet taka siam turin Chief Minister hnenah an thlen a ni. Saihapui-V VTF bûk tichhe khawpa Assam police leh civil mi an thawk ngam chu Mizo mipui an tham lohzia lantirnaa an ngaih thu an sawi.

Hemi chungchangah hian CM Zoramthanga chuan, MZP ngenna leh IR camp chu siam a nih theih nana hmalak a nih tur leh a ṭul anga bawhzui a nih tur thu a sawi niin MZP chuan an tarlang.

Vairengte leh Lailapur inkar kawngpui kama Lailapur hoin dawr an siam, October 18 zana ṭhiah leh hâlna hmunah Assam hoin an luah leh hmaa IR camp siam turin MZP chuan an ngen a; Chief Minister chuan, a bawhzui tur thu leh ruahmanna an neih mek thu a lo hrilh.

MZP chuan, ramria buaina vanga Lailapur vai (illegal migrant) hoin Mizoram ei leh bàr làk luhna kawngpui an dang dawn a nih chuan, Tripura, Manipur, Burma leh Bangladesh aṭanga ei leh bâr lâk luh dan ngaihtuah ṭha an tih thu leh, chuta tan chuan state páwna Zo hnahthlakte biakna kawngah an inhuam thu an sawi bawk.