Mizoram Governor hna thawk turin Indra Sena Reddy Nallu lak luh a ni

Mizoram Governor atan nimin khan Raj Bhavan-ah Indra Sena Reddy Nallu lak luh a ni. Indra Sena Reddy Nallu hi Tripura larsap ni lai a ni a, Mizoran larsap Dr Hari Babu Kambhampati-a'n chawlh a lâk chhungin Mizoram larsap hna a thawk tel dawn a ni.

Governor lak luhna inkhawm hi Raj Bhavan Durbar Hall-ah buatsaih a ni a; chief secretary Dr Renu Sharma-i'n President thupek a chhiar hnuah Gauhati High Court judge Justice Nelson Sailo-in Indra Sena Reddy Nallu chu rinawmna thu tiamtirin, Mizoram Governor hna thawk turin a la lut a ni.

Lak luhna inkhawmah hian chief minister Lalduhoma, Assembly speaker Lalbiakzama, Home minister K Sapdanga, cabinet minister dangte leh minister of state te, Lok Sabha MP Richard Vanlalhmangaiha, DGP leh sorkar mi pawimawh dangte an tel.

Indra Sena Reddy Nallu hi March 31, 1949 khan Telangana state-a Nalgonda district chhunga thingtlang khua Ganuga Banda-ah a piang a, a nupui Renuka Nallu nen fapa pathum an nei. Kum 1983, 1985 leh 1999 khan Andhra Pradesh (Telangana state pian hma)-ah MLA atan thlan tlin a ni a; kum 2003 khan Andhra Pradesh-ah BJP president niin, kum 2014 khan BJP national general secretary a ni leh bawk.

Indra Sena Reddy Nallu hi Mizoram state governor 23-na a ni a; Mizoram larsap ni tawh mi 23 zinga pariat chu state dang govenor ni chunga Mizoram governor hna hmuite an ni.