AMC páwnah ration card ennawn dawn; Thi tawh ration card-a la awm 2,316 hmu

Food, Civil Supplies & Consumer Affairs (FCSCA) department chuan thuchhuah siamin, Aizawl Municipal area pawn lamah October 2024 aṭangin ration card ennawn hna kalpui a ni dawn tih an tarlang. Aizawl leh Lunglei khawpui huam chhungah mitthi tawh ration card-a la awm mi 2,316 hmuh chhuah a ni tawh.

FCSCA department tarlan danin, AMC huam chhunga ration card ennawn report thehluh hun hnuhnung department-in an siam chu September 27, 2024 kha a ni a, nimin thleng khan veng 34-in thehlut tawhin, veng 49-in NFSA report sorkarah an la thehlut lo.

Veng tina NFSA committee-te chu an veng ṭheuhah an thlan chhuahte list mi tinin awlsam taka an hmuh theihna hmuna târ chhuak tur leh veng chhung WhatsApp group darh zauahte thehdarh tura tih an ni a; NFSA hnuaia awm phu, dinhmun harsate hmaih an nih loh nan sorkar chuan theihtawp a chhuah mek a ni.

Aizawl East leh Aizawl West DCSO-in an report danin, mitthi tawh ration card aṭanga paih tur AMC huam chhungah mi 1,139 hmuh chhuah tawh a ni a, enfiah mek zel a ni. Thla ruk chhunga ration khul ngai lo chhungkaw 6,500 vel hmuh chhuah tawh niin, chu'ngte chu ration lak an mamawh loa ngaih an ni a; chu'ng zinga NFSA quota late aiah NFSA mamawhtute dah luh a ni ang.

Lunglei Municipal Council huam chhunga local council 24 aṭangin mitthi tawh, ration card-a la awm mi 1,177 hmuh chhuah tawh an ni bawk a, endik mek zel a ni. Aizawl leh Lungleia mitthi tawh, ration card-a la awm hmuh chhuah tawh zat chu 2,316 a tling.

Ration card ennawn hi dik taka kalpui a nih zel theih nan sawi tur leh complaint duh neite chuan NFSA chairman (bialtu DCSO)-ah thlen ṭhin turin FCSCA department chuan mipui a chah a; ration card enṭhatnaah ṭha taka ṭawiawm turin mipui a ngen bawk.