Sorkar buatsaihin Mím Kût hman a ni

Social Welfare and Tribal Affairs department huaihawtin nimin khan Vanapa Hall-ah Mím Kût hman a ni. SWTAWCD Lalrinpuii khuallian a ni a; hnam lâm, lemchan, zaipawl leh malzaite entira ngaihthlak a ni.

Minister Lalrinpuii chuan, Mím Kût chu sorkar huaihawtin kum 2023-ah hman ṭan a nih thu sawiin, "Hmangaih kaltate puala thil tih khawm leh hun serhte hi Mizote zingah leh hnam hrang hrang zingah pawh tih dan fo a ni," a ti a; Social Welfare & Tribal Affairs hmalakna pakhat TRI scheme hnuaia Mizo kûtte tuaithar lehnate atan sorkar, mithiamte leh tlawmngai pawlte nen Mím Kût hman dan tur duan a nih thu a sawi.

Lalrinpuii chuan, Mizo kûtte chu khawvel hriata pho chhuah hmain a neitu Mizo mipui rilru chawh thawh phawt a ṭul thu a sawi a; kût hman danah thu ken bik neiin, mitthi pual thlai chhiah aiah mi harsa zawkte tana luan chhuahna hun hmang tura insàwmna leh hmangaih kal tate zalhna thlân tihfaina hun hmante chu ṭha hlea a hriat thu a sawi bawk.

Mím Kût hmannaah Social Welfare & Tribal Affairs director Lalhriatzuali Ralte pawhin thu a sawi a; Kût puala buatsaih essay inziahsiak lawmman sem a ni.