Kan kawng chhiat chhan ber agreement fel loh vang leh vil zui loh vang - ZPM

ZPM thupuangtu K Laltluangkima chuan, kawng siam tura Mizoram sorkar leh Sadguru inkara inremna ziahah contract agreement kalphunga la awm ngai lo a inzeh nual thu leh, kawng a chhiat chhan ber chu a bul aṭangin agreement fel tâwk loh vang leh vil zui loh vang a nih thu a sawi.

K Laltluangkima hian nimin khan Aizawl Press Club-ah thuthar thehdarhtute a kâwm a; Sadguru Engineers & Allied Services-in Bairabi - Bilkhawthlir, Bilkhawthlir - Kolasib leh Kawnpui - Khamrang inkar kawng an siam thu a sawi a, "EPC contract agreement hmangin April 19, 2021 khan agreement ziah a ni a, Ministry of Road Transport & Highways aiawhin Mizoram PWD Chief Engineer (Highways) leh Sadguru company-te'n hming an ziak. Agreement-ah hian EPC contract agreement kalphunga la awm ngai lo a inzep nual," a ti.

Kawnpui-Khamrang kawng km. 15-a sei siamna atana Letter of Acceptance (LOA) chu sorkarin January 25, 2021-ah a pe tih sawiin Laltluangkima chuan, "LOA (work order)-ah hian contractor-te'n ni 30 chhungin contract agreement an sign tur a nih thu te, agreement sign turin performance security Rs 35,37,000 an dah nghal tur a nih thu te, ni 30 chhunga an sign hman loh chuan extension an dil theih thu leh ni 60 chhungin an sign ngei tur a nih thute a inziak. Ni 60 chhunga agreement an sign loh chuan hna pek loh tur a ni a, tender an chhan laia bid security an chân vek tur a ni," a ti a; Sadguru-in work order/LOA an hmuh aṭanga ni 80 hnu, April 19, 2021-ah contract agreement an ziah thu a sawi.

ZPM thupuangtu chuan, performance security pawh EPC contract agreement danah chuan contract amount aṭanga 5% dah tur ni mah se, 3% chauh dah a nih thu a sawi a, "5% chu dah se Rs 58,95,000 a ni ang. Kawnpui-Khamrang kawng hi Sadguru hian May 6, 2022-a completion certificate pek an nih aṭanga kum 3 chhung, May 6, 2025 thleng an enkawlzui tur a ni," a ti.

Defect Liability Period (DLP) atan cheng nuai 12.54 dah a nih thu sawiin K Laltluangkima chuan, "DLP a tlemna chhan chu kawng repair-na atana hman tur contract agreement-ah 'Contract amount aṭangin 1% chauh a ni ang' tih an lo dah vang a ni. Kawng a chhiat chhan ber chu a bul aṭangin agreement a fel tâwk loh vang leh monitor zui a nih loh vang a ni," a ti bawk.