ZPM kaihhruai zelin farmer society an din - MPCC Treasurer

Congress party treasurer Dr Lalmalsawmna Nghaka chuan nimin khan Aizawl Press Club-ah thuthar thehdarhtute a kâwma; ZPM unit kaihhruai zelin farmer society din a nih thu a sawi.

Dr Lalmalsawma chuan, thlai thar lei turin khaw tinah farmer society din chhoh mek a nih thu sawiin, "Khaw tam takah farmer society an lo din tawhna awm mah se, chungte chu hlamchhiahin ZPM unit-te kaihhruaiin society an din zel. Hemi chungchangah hian thil dik lo tam tak thingtlang lam aṭangin kan dawng a, chung zinga pakhat, Mamit district-a Rajiv Nagar khuaa thil thleng hi a ni," a ti.

Rajiv Nagar-ah broom society pathum a awm tawh sa nia sawiin Dr Lalmalsawma chuan, "Hei hi ZPM sorkarin pawm loin, Cooperative Farming Society, Rajiv Nagar-I a inchhun fin turin Land Resource, Soil & Water Conservation Director hmangin society awm sate hriattir an ni," a ti a; inchhun fin a ngaih chhan chu society pathum an awm chu Agriculture Marketing Assurance Fund Management Board duh dan kalh a nih vang a nih thu ziah tel a ni tih a sawi.

MPCC Treasurer sawi danin, LRSWC Director-in Rajiv Nagar-l Broom Grower Society inthlanna nei turin a hriattir nghal a, inthlanpui turin department mi leh sa pathum ruat a ni.

August 6, 2024 inthlan a ni a, chuta an thlan chhuahte chu ZPM VC Bahulal Chakma ten an pawm thei lo a, ZPM hotute hnenah an zualko a ni. ZPM tana Mamit bial viltu H Zorempuia, ZPM secretary-in a changtu minister hmuin, recomendation an siam a, society member-te thlan ni lo Bahulal Chakma chu society hruaituah an ruat ta a ni.