Manṭang ei kan tum ve lo - ZPM MLA

ZPM Gen.Hqrs chuan nimin khan an pisaah chhung inkhawm an hmang a; thusawitu Lalramliana Papuia, MLA chuan, kalphung thar mipui sorkarah minister leh MLA-te'n manṭang ei an tum ve loh thu leh, Pathian duh dan anga an kal zel chuan ram rorelna an kutah a awm zel a rin thu a sawi.

Lalramliana Papuia chuan, tun hmain contract hnathawh tur a awmin manṭang ei an awm chhâwng duat ṭhina sawi a nih thu a sawi a, "Hnain a tuar a, hmasawnna ro tling kan ei thei ṭhin lo. Kalphung tharah chuan minister leh MLA-te'n manṭang ei kan tum ve lo a, hna pawh a ṭha tur a ni tih hi kan phût tlat a ni. Minister leh MLA-te'n theihtawp kan chhuah angin, party worker-te'n kalphung thar rilru tak tak leh ram siamṭhat duhna tak tak kan put a ngai a, chu chu kan ram damna tur a ni," a ti.

Mizorama politics kalphung hlui ṭha lo, hun rei tak party ṭhenkhatte'n an kalpui tawh chu ZPM-ah chhawm luh a rem lo tih sawiin Lunglei South bialtu MLA chuan, "Kalphung thar kan chuangkai tawh a, mipui pawhin kalphung thar rilru kan put a ṭul. Inthamna eng eng emaw nena MLA hnena ar va khai tumte hi kan awm ang tih ka hlau," a ti. Eptu party-te aṭangin beih an tâwk nasa tih sawiin, "Min beitute hi party ruihchilh, hun rei tak kan ram lo hruai tawhtu, mipuiin an hnâwl tâkte an ni a, kan chhiatna tur zawngtute thurâwn leh duh dan anga kal kan tum tur a ni lo," a ti bawk.