State páwn lam mite'n sumdawnna an khawih theih chin tihchian duh

Import Export (IEC) Holder Association, Mizoram chuan thuchhuah siamin, state páwn lam mite'n sumdawnna an khawih theih chin Mizoram sorkarin tichiang se an duh thu an tarlang.

IEC Holder Association chuan, Mizoram chu international boundary-a awm a nih avangin sumdawngte tan hamṭhatna kawng zau tak a awm thu an sawi a, "Mizoram chhungah ram páwn lam mi (non-Mizo/foreigner)-te hi state sorkarin sumdawnna an khawih theih chin tichiang se," an ti.

Custom duty-te nen inthurualin bungraw lak luh leh thawn chhuah dan kawng zawn ṭha an tih thu tarlangin IEC Holder Association chuan, "Ram dang bungrua a lo luhna hmuna Custom duty felfai taka a awm ṭha kan ti a, Mizoram hmun laili remchang apianga Custom checkgate awm hi ṭha kan ti lo a, a rang thei ang berin state sorkar hian tihtawp a nih theih nan hma la se," an ti a; dan loa bungraw lak luh awm ṭhin chu sorkar leh Custom lamte'n tihtawp dan zawng se ṭha an tih thu an tarlang bawk.