Rastriya Poshan Maah khâr a ni

September thla chhunga hman, Rastriya Poshan Maah (National Nutrition Month) chu nimin khan khâr a ni a, Women and Child Department (WCD) buatsaihin Tavern Lodge, Aizawlah khârna inkhawm buatsaih niin, minister of state B Lalchhanzova'n a hmanpui.

B Lalchhanzova chuan, naupangte chu ram hruaitu la tur an nih thu sawiin, "Kumtluana naupangte mamawh chaw ṭha pek hi naupangte kan hmangaihna kan lantir theihna leh an thinlung thûk taka kan hneh theihna a ni," a ti a; naupangte chu an tuina leh an kalna tur àwma kaihruaitu ni zel tura thawhhona ṭha nei turin a kaihhnawih sorkar department-te a chah.

Minister hian Saksham Anganwadi & Poshan 2.0 lemchan tawi a tlangzarh a; Mission Saksham Anganwadi & Poshan 2.0 chunghang WCD director Zoramthangi Chhangte-in a sawifiah.

Poshan Maah hi September thla chhung zawng hman a ni ṭhin a, kumin hi a ṭum sarihna a ni. Poshan Maah chhungin naupangte chawṭha pek pawimawhzia inzirtirna kawng hrang hrangin kalpui a ni a; WCD, Health department, School Education department leh a kaihhnawih department dangte an tel a ni.