KHAWTHLIR

Lirthei intlân chhawk tidanglam

Mizoram sorkarin thlasik laia sorkar pisa kai hun a tihdanglam avangin Traffic SP Stephen Lalrinawma chuan Aizawl khawpuia lirthei intlân chhâwk hun chu October 1, 2024 aṭanga February 28, 2025 chhungin zing dar 9:30 aṭanga tlai dar 5 thleng a nih dawn thu a tarlang. Lirthei intlân chhâwk hian Inrinni, Pathianni leh sorkar chawlh (holiday)-te a huam lo. Taxi-te chu Inrinni-ah chawhnu dar 1 aṭangin an vaia tlan phal a ni a, Pathianni leh holiday-ah an vaia tlan phal a ni bawk.

Lirthei chesualah naupang thi

September 28-29, 2024 chhunga BCM hnuaia Kristian Naupang Pawl, Sakawrdai Bial inkhawmpui, Zohmun BCM biak-ina neiha tel Mauchar KNP member-te phurtu lirthei (pick-up) chu Pathianni zan dar 9 vel khan Maucharah kopang súin chesual a; a hmunah Benjamin Lalrimawia (9) s/o Lalsiamkima (driver) a thi a, mi dang pasarih an hliam. Hliamte chu naupang pali leh puitling pathum an ni a, driver Lalsiamkima leh a nupui leh an fate pahnih leh, Lalmalsawma leh a fate pahnih an ni.

NEC Vision 2047

North Eastern Development Finance Corporation Ltd, North Eastern Council leh Development of North Eastern Region-te chuan nimin khan Aijal Club-ah 'Consultative meeting on NEC Vision 2047' an buatsaih a; Planning additional secretary Irene Lalhlimpuii Chongthu-in hmanpuiin thu a sawi. NEC economic adviser Sherry Lalthangzo, NEDFi executive director SK Baruah leh NEC Vision 2047 Drafting Committee member Prof. KM Bujarbaruah ten thu an sawi bawk.

SHC electoral  roll tlangzarh

Aizawl district election officer Lalhriatpuia, bawrhsap chuan nimin khan DC conference hall-ah Sinlung Hills Council Election 2024 neih tura final electoral roll a tlangzarh. Electoral roll tharah hian voter 10,799 an awm a, mipa 5,338 leh hmeichhia 5,461 an ni. Kolasib DEO Robert C Lalhmangaiha pawhin Kolasib district chhung bika SHC electoral roll thar a tlangzarh. Kolasib district chhunga SHC electoral roll tharah hian voter voter 4,943 an awm a, mipa 2,463 leh hmeichhia 2,480 an ni.

Zirna Kûtpui

Mizo Students’ Association, Bangalore chuan September 28, 2024 khan Bengaluru-ah Zirna Kûtpui an hmang a, Higher & Technical Education minister Dr Vanlalthlana'n hmanpuiin, fuihna thu a sawi. Zirna Kutpuia thupui chu, 'Zir la, ṭanpui la, humhim rawh' tih a ni a; zirlai ti ṭha chawimawina hun hman a nih bakah, Kûtpui puala intihsiakna hrang hranga ti ṭhate hnenah lawmman sem a ni.

Fai intihsiak endik

Swachhata Hi Seva 2024 leh Mizoram Cleanliness Week puala Khawzawl khawpuia veng leh sikul hrang hrangte September thla tawpa fai intihsiakna chu nimin khan sorkar aiawh endiktute'n an endik. October 2, 2024 khian intihsiakna result puanna leh lawmman semna hun hman a ni ang.