ACB-in kuminah FIR 4 a dawng tawh Court-ah chargesheet pali an thehlut

Anti Corruption Bureau (ACB) chuan kumin chhungin FIR (complaint) pali an dawng tawh a, chung zinga pathum chu chhui zel tur (Inquiry) atana ziah luh a ni. Kumin chhung vekin ACB hian chargesheet pali Court-ah an thehlut tawh.

ACB-in complaint a dawn zinga chhui zui atana an ziah luhte chu - Silsuri VCP Snehna Ranjan Chakma leh a thawhpuite MNGREGS sum hmang dik loa puhna te, 2nd IR Bn. constable pakhat a medical bill tihfel vek tawh anga inziak, pawisa hmuh tur awm si lo leh, MAMCO-a sum hman dan dik tawk lo awma inpuhnate a ni. MAMCO hi sorkarin chhui zui ngai nia a hriat avangin ACB-ah hian complaint an thehlut a ni.
Inquiry tihzui tura la ziah luh loh chu IWDP hnuaia East Lungdara bazar shed siamnaah leh Leng khuaa water tanky reservoir siamnaa thil dik lo awm nia complaint lut a ni. ACB chuan, Vigilance department-ah chhui zui chi a nih leh nih loh an zawt mek a, chhanna an la dawng lo.
ACB chuan kumin chhungin thubuai pakhat, 'Surveyor H Lalnunsiama a thuneihna hmangsual a, ram eng emaw zat neia puhna' chu inquiry an neih zawh hnuah chhui zui zel tlakah ngaiin thubuai an ziak lut.
Thu dawn danin, ACB-te hian an hnena complaint a luhin Vigilance department-ah chhui zui chi a nih leh nih loh an zawt a, Vigilance-in chhui zui tlaka an ngaih chuan inquiry an tih chhunzawm ṭhin.
Inquiry an tih zawhah chhui zui zel tlaka an ngaih chuan Vigilance-ah vek criminal case nge, departmental inquiry-a kalpui zui zel tur an ráwn leh a, criminal inquiry tura tih a nih chuan ACB hian an chhui zui leh ṭhin. An chhui zawhah Court-ah chargesheet an thehlut a ni.
Tun dinhmunah ACB hian criminal case chhui lai mek 11 leh inquiry tih lai panga an nei a ni.
ACB-in kumina chargesheet an thehluhte:
• PWD E-in-C hlui pa­hnih Liansanga leh Lian­chung­nunga leh, PWD assistant B Lalchungnunga te Serkhan-Bagha road siamnaa sum tihchingpena puhna thubuai.
• Horiculture director R Zo­tawna leh hotu dang - SR Lal­niliana, T Vanupa, Lian­luaia leh Ramrela te Hariyali Project kalpuinaa sum tihchingpena puhna thubuai.
• Surveyor pahnih Lalrinsanga Khiangte leh C Lalrammawia bakah, mi dang 14 (khawtlang hruaitute leh zangnadawmna phûttute) Bairabi-Sairang rel kawnga atana ram laka zangnadawmna dik lo taka lak tuma puhna thubuai.
• Saiha College principal C Zohupa UGC fund hman dik loa puhna thubuai.