KHAWTHLIR

Naupang dan tum
Lungleia sikul ṭan hma duh lote chuan tukin hian zing dar 8:30 thleng sikul kai tur naupangte dan an tum nia thu dawn a ni. Sikul dan tumtute hian sikul ṭan hma an duh lo a, zing dar 9-ah ṭan an duh a ni.

Ran 7,78,051 talh
AH & Vety department chhinchhiah danin, kum 2014-15 chhung khan state dang leh ram dang aṭangin Mizoramah ran 12,77,375 lak luh a ni a, ran 7,78,051 talh a ni. AH&Vety-a veterinary hospital leh dispensary-te'n kum 2014-15 chhungin sorkar sum báwmah Rs. 29,12,827 an chhung lut bawk.

Heroin man
SRS-te chuan Pathianni khan Tuirial-ah heroin hawng li leh can 12 an man a, a neitua puh Lalthanzauva (27), Tuirial nia insawi an man bawk. Heroin an man hi tualchhungah Rs. 2,40,000 man vel a ni.

Basketball court hawng
Mara Autonomous District Council (MADC) CEM RT Zachono chuan, cheng nuai 6.1 senga sak Meisaval West-a basketball court chu nimin khan a hawng. RT Zachono chuan MADC-in ṭhalaite infiamna khawvel thar siamsak turin ṭan a lak chhoh mek thu a sawi.

MJA conference
MJA executive committee nimina Aizawl Press Club-a ṭhukhawm chuan May 13-15 chhunga MJA general conference neih tura programme leh agenda an thlirho. Conference-a kal turte chu May 7 chhun dar 12 hmaa MJA hruaitute hnena inhriattir nise, an ti.

Lakluh khap
Champhai addl. DC R Vanlalsawta chuan thupek chhuahin Manipur-ah ar natna chi khat Avian Influenza a len avangin Champhai district huam chhungah Manipur aṭanga ar vulh tur emaw, artui lakluh a khap. Champhai district tan hian Khawkawn khuaah thla hnih chhung atan temporary check gate siam a ni a, vety doctor an duty a ni.