Mizorama thil tih demin Assam-ah kawngpui an dang

Cachar district, Assam-a pawl hrang hrangte chuan, MZP leh Mizo Ṭhalai Pawl (MṬP) ten Mizorama hnam dang sumdawng an endik duh loh lantirna atan nimin zing dar 6 aṭang khan Lailapur-ah NH-54 leh Ramnathpur-ah NH-154 kawngpui an dang a; Cachar district-a MLA pathumte nen an inbiak hnuah tlai dar 5:30 vel khan an titawp.

Silchar-a Mizoram House deputy resident commissioner Malsawm­sanga hnen aṭanga thu dawn danin, Bairabi-Hailakandi kawng chu Pathianni aṭang khan Progressive Students & Youth Forum leh pawl hrang hrang ṭangrualte chuan Ramnathpur-ah an dang a; All Assam Students Union, BBP, Jubo Chhatro Parishad, Samaj Nunnayan Sangatha,Sanga Logu Unayan Parishad, Jubo Iudf leh Jubo Congress-te'n an thlawp a ni.

Mizoram châk lakna kawngpui ber, NH-54 chu nimin zing dar 6:00 aṭang khan tiam chin awm loin Lailapur-ah dan a ni a; kawng dangtu pawlte chu - Forum for the Protection of Non-Mizos, Amar Bengali, All Cachar-Hailakandi-Karimganj Students Association, Barak Nagarik Sansad leh pawl dangte an ni.

Kawng an dan chhan ber chu, sorkar thuneitute ni lo, MZP leh MṬP ten Mizorama hnam dang sumdawngte an endik a, harsatna an siamsak vang a ni a; October 17, 1994-a Assam leh Mizoram chief secretary-te inremna chu tipuitling turin Mizoram sorkar an phût bawk tih an sawi.

Thu dawn danin, Cachar-a pawl hrang hrangte leh Cachar district-a sorkar hotute chu vawiin hian Cachar additional DC office-ah an inkâwm dawn a, MZP leh MṬP-te chêt dan an sawiho ang. Kawng dan a nih avang hian nimin khan Vairengte leh Lailapur-ah lirthei tam tak a tangkhang a ni.

Hetih lai hian, MZP leh MPC party ṭhalaite chuan thuchhuah siamin, Lailapur Truck Owners’ Association leh Truck Driver Association-te'n Lailapur, Assam-a tiam chin awm loa NH-54 kawngpui an dang chu an hriatthiam loh thu an tarlang.