Duhoma báng tura ngenna a luh belh Kum 30 kal tain awmzia a nei lo - MNF
MLA aṭanga ZPM Legislature Party (ZLP) leader Lalduhoma bàn a nih theih nan MNF party MLA pahnih chuan nimin khan Assembly speaker Lalrinliana Sailo hnenah hêkna lehkha an thehlut ve leh. MNF party chuan nimin vek khan thuchhuah siamin, kum 30 kal taa thil thleng sawi chhuahin awmzia a nei lo niin an tarlang.
Lalduhoma, MLA aṭanga bàng tura Speaker hnena nimina ngenna thehluttute chu Lunglei South bialtu MLA Dr K Pachhunga leh Lunglei East bialtu MLA Lawmawma Tochhawng an ni. Vanglaini palai zawhna chhangin Dr K Pachhunga chuan, MNF MLA 12-te chuan lungrual takin MLA aṭanga báng tura ngenna thehluh an rél niin a sawi.
Dr K Pachhunga chuan, September 21, 2020 khan Aizawla an awm loh avangin MLA dang rualin Speaker hnenah lehkha an thehluh ve hman loh thu sawiin, "Kan hman veleh MNF MLA-te kan lungrualzia lantir nan lehkha kan thehlut a ni," a ti.
MLA aṭanga Lalduhoma a bàn theihna turin MNF MLA 10 chuan September 21 khan Speaker hnenah hêkna lehkha an lo thehlut tawh. MNF MLA zinga lehkha thehluttute chu - chief minister, deputy chief minister, speaker, minister, deputy speaker leh govt. deputy chief whip ni lo zawng an ni.
Legislative Assembly chuan nimin khan bulletin ti chhuakin, MLA 12 te'n Serchhip bialtu MLA Lalduhoma, MLA aṭanga ban tura ngenna an thehluh thu hi an tarlang a ni. MNF party chuan thuchhuah siamin, an MLA-te'n Anti Defection Law bawhchhia tia Speaker hnena lehkha pea an thlen thuah Lalduhoma'n, 'MNF-te hian kum 1987 khan independent angin MLA 24 an tling a, chuti chuan sorkar an siam a, mi tu mahin an hêkin an sawi buai lo,' tiin a sawi niin an tarlang a, chu chu an chháng.
MNF party chuan, kum 1987-a inthlanah MNF-in MLA 24 an neih avangin Governor-in sorkarna a siamtir thu tarlangin, "An hun tàwp thleng khan chutiang chiah chuan an kal. MLA thlan tlin party-in member 21 aia tam an neih chuan Mizoramah chuan sorkarna an siam mai ṭhin. Chu chu eng páwl leh group pawh ni se a dik a, a thiang a, dan ang tak a ni reng a ni," an ti.
Kum 2018 MLA inthlanah Lalduhoma leh a thurualpuite'n MLA 21 aia tam nei se, sawisel theih lohin sorkar siam mai tur an nia sawiin MNF chuan, "Chutiang chiah chu kha tih laia MNF-in sorkarna an siam pawh kha a ni," an ti a; kum 30 kal tawha thil thleng chu miin an sawi pawr ngai lo a, sawi pawr tur pawh a awm lo niin an tarlang.
Lalduhoma chu Anti-Defection Law siamtute zingah a tel nia sawiin MNF party chuan, "Mizo zingah chu an dan siam bawhchhetu leh chu danin a phuar hmasak ber a ni. Chu chu Congress hun lai khan a ni. Tunah MNF hun laiin chu dan bawk chu a bawhchhiaa hriat a ni a, buaina a tâwk leh ta a ni," an ti.