Biate Water Supply Scheme pawm a ni

Sorkar laipuia Mi­nis­try of Urban Development chuan, Biate Water Supply Scheme (Pum­ping) Project, cheng nuai 1,364.67 senna tur chu nimin khan sanction order a tichhuak.

Biate khaw tui lakna atan hian PHE depart­ment chuan DPR siamin DoNER-ah kum 2007-08 ah an thehlut tawh a, DoNER lamin a tifel mai lo. Tihfel a nih loh chhungin project chu siam ṭhat a ni a, khaw 11 (khawpui pathum leh thingtlang khaw pariat) huam turin project chu cheng vbc. 34.18 man turin siam leh a ni. NLCPR guidelines-in town leh town lote chu project pakhata khung a rem tih loh avangin cen­sus town pathum tuam turin cheng vbc. 28.76 hû project siam leh a ni.

Cheng vbc. 28.76 hu project chu thehluh a nih hnuah DoNER chuan vbc. 15-ah a tihniam a, hei vang hian kum 2009-10 khan Biate leh Khawhai tuam turin project chu tihtêt a ni. Chumi hnuah North Vanlaiphai khua huamtir leh a ni a, project cost pawh vbc. 28.11-ah tihsan leh niin, kum 2013-ah DoNER-ah thehluh leh a ni.

PHE minister Zodintluanga leh PHE leh UD&PA officer-te'n an bawhzui a, Ministry of Urban De­velopment hnuaia 10% Lumpsum Grant aṭanga funding hmuh turin dilna an thehlut a, Urban Development Ministry chuan pawmin, project chu a tichhuak ta a ni.

UD&PA leh PHE Minister zodintluanga chuan, “Biate mipuiten nghakhlel taka an thlir laiin DONER-in min sanction mai si lo a, Biate mipuite an beidawn phah hle a ni,” a ti a; Ministry of Urban Development aṭanga a hlawhtlin theih nana rim taka thawktu department officer-te an chhuanawm thu a sawi.

Biate Water Supply Scheme atan hian Tuipui tui pump tur a ni.