CSS hnuaia thawkte hlawh lâk theih loh chhan kan ni lo: Finance dept.

Finance department hotute chuan, tun hnaia Centrally Spon­sored Scheme (CSS) ṭhenkhat hnuaia thawkte'n hlawh an lâk theih loh chhan chu Finance department mawh a nih vek loh thu an sawi a; Sarva Shiksha Abhiyan (SSA) leh National Health Mission (NHM) hnuaia thawkte hlawh tur chu tun hnai khan an pek chhuah thu Vanglaini palai an hrilh.

Vanglaini palai zawhna chhang­in, Finance secretary F Van­lalruata chuan, CSS ṭhenkhat hnuaia thawkte'n hlawh an lak tlai chhan chu Finance department-in implementing agency-te hnenah sum an pek chhuah tlai vang a nih vek loh thu a sawi a, "Sum dilna an rawn thehlut tlai ve bawk ṭhin a ni," a ti.

F Vanlalruata chuan, Central-in CSS sum a rawn pekte chu implementing agency-te'n an dil tlai fo thu a sawi rualin, Finance lam pawhin thil an tih zung zung theih bik loh thu a sawi a, "An sawi ang em ema Finance-a sum táng a awm lo, Planning a kaltlang vek a ngai a, chu chuan a titlai ve ṭhin," a ti.

December 2014 aṭanga March 2015 inkar, thla li chhunga SSA hnuaia thawkte'n hlawh an lak tawh loh chungchanga zawhna chhangin, Finance department hotute chuan, kumin April thla tìr lam khan thawktu zawng zawngte hlawh daih sum an pek chhuah thu an sawi.

Health department hnuaia CSS hrang hranga thawkte'n January-March 2015 chhung hlawh tun thlenga an la lak loh chhan zawhna chhangin, Finance Secretary chuan, Central-in sum a rawn pek tlai vang a nih thu a sawi.Central-in sum a pek tlai vangin implementing agency (NHM) lam pawhin April 2015-ah sum dilna an thehluh chauh thu a sawi.

Health Secretary sawi danin, sorkar laipui chuan Mizorama RCH atan March 20, 2015-ah cheng nuai 981 an pe a; March 20-ah vek NHM atan nuai 905 a pe a, NHM atan vek hian March 30-ah Mizoram sorkarin matching share nuai 600 a pe chhuak. Central-in NPCDCS tan March 27-ah vêk cheng nuai 52.64 a pe chhuak bawk. March thla chhunga Health department hnuaia CSS hrang hrang atana Finance department-a sum pek zat chu nuai 2538.64 a ni.

Finance department hian NHM leh RCH aṭangin April 13, 2015-ah sum hman phal dilna an dawng a; April 23, 2015-ah cheng vbc. 10.74 hman phalna a pe chhuak a, vbc. 14.64 a la pe chhuak lo a ni.