Shillong-ah Swine Flu an sawiho

April 24-25, 2015 chhung khan Shillong-ah 'Swine flu and other emerging infectious diseases’ tih thupui hmangin hmarchhak bial huap inràwnkhawmna neih a ni.

Consultative conference-ah hian India hmarchhak state-te danglamna bik hre chunga khawvela hripui léng ṭhin laka hmalak dan tur sawiho a ni a; sorkar laipuia Ministry of Health & Family Welfare mi pawimawh leh medical scientist eng emaw zat an tel. Tun hnaia India ram chhunga H1N1 Flu len laia an hmalakna leh an hmachhawp hrang hrangte state aiawhte chuan an tarlang.

Conference-ah hian H1Na endik turin hmun danga thawn ngai lo a, hmarchhak state tina RT–PCR hmanga endik a nih theih nana NEC hmalak dan tur rel a ni.

NEC secretary Ameising chuan, Integrated Disease Surveillance Programme (IDSP)-a Mizoram sorkar hmalakna a fak a; hmarchhak state dangte tana entawn tlak a nih thu a sawi niin sorkar thuchhuah chuan a tarlang.

Conference-ah hian Mizoram aṭangin IDSP state nodal officer Dr Pachuau Lalmalsawma leh Aizawl Civil Hospital-a microbiologist Yogesh Malvi te an tel a ni. Dr. Pachuau Lal­malsawma chuan harsatna tam tak paltlangin, inlungrualna nen department chhung leh pawn lam mite'n theihtawp chhuaha hna an thawh ṭhin thu a sawi.