VC/LC inthlan atan inbuatsaih mek

April 30, 2015-a vilage council leh local council inthlanna turah inbuatsaihna kalpui mek a ni a; Aizawlah chuan nimin khan returning officer leh presiding officer-te tan Vanapa Hall-ah training buatsaih a ni.

Aizawl district atan hian returing officer 83 leh presiding officer 166 ruat a ni a, training-ah hian inthlan buaipuina atana mamawh chi hrang hrang pek an ni. Nimin vek khan ballot paper-te chu DC office aṭanga sem chhuah a ni bawk.

Champhaiah chuan Champhai North leh Champhai South biala returning officer leh presiding officer-te tan training hnuhnung ber DC conference hall-ah buatsaih a ni.

Training hmanpuitu, Champhai DC H Lalengmawia chuan, inthlanna felfai tak a awm theihna atan RO leh PO-te chu fimkhur turin a chah a, "Inthlan laia thil felhlel awm hi inthlahdah vang a ni tlangpui," a ti.

Mamitah pawh presiding officer leh polling officer-te tan DC conference hall-ah training buatsaih a ni a, Mamit DC Vanlalngaihsaka'n RO leh PO-te chu fimkhur taka hna thawk turin a chah a ni.