Synod Bookroom-in Rs.2,34,01,405 a hmu Ṭhalaite'n lehkhabu an chhiar tam loah ngai

Synod Bookroom chuan kum liam ta, 2014-15 chhung khan lehkhabu leh thil dang an zawrh aṭangin Rs. 12,34,01,405 an hmu. Mizorama leh­khabu zuartu lian ber Synod Bookroom enkawltute chuan, Mizo ṭhalaite'n lehkhabu an chhiar nasa tâwk lo niin an sawi.

Synod Bookroom hian April 2014 - March 2015 chhunga sum hmuh tura an beisei zat (budget) Rs. 6,80,00,000 a ni a, budget hi Rs. 5,54,01,405-in an khûm a ni.

Synod Bookroom hian Aizawl leh thing­tlanga KṬP branch hrang hrangte Literature Night an neihpui ṭhin a; chu'ng aṭanga an hmuh chhuah dan chuan, Mizo ṭhalai zingah lehkhabu chhiar an tam lo hle tiin an chhinchhiah a ni.

Synod Bookroom-in kum li kal ta chhunga Aizawl leh thingtlang kohhran hrang hrang KṬP member-te dinhmun an zir chianna leh zawhna hrang hrang chhanna an dawn khawm aṭanga a lan danin, zawhna an zawh zinga 54.32% chuan, lehkhabu an lei ngai lo tih an sawi.

Synod Bookroom zir chiannaa a lan danin, KṬP member zingah lehkhabu Rs. 100 hnuai lam man lei ṭhin 10% an awm a, Rs. 100-500 inkar lei ṭhin mi 20.21% an awm. Rs. 500-1000 inkar man lei ṭhin 11.37% an awm a, Rs. 1,000 chung lam man lei ṭhin chu 7.58% an awm a ni.

Lehkhabu chhiar tam tâwk loh chhan khaikhawmnaah chuan, 38%-in chhiar tumna rilru an nei lo hrim hrim a; 'Chhiar tur ka hre lo' tih leh 'Ka chhiar hman ngang lo' ti 22.53% ve ve an awm. Chhiar lai mek nei erawh 48% an tling thung.

Ṭhalaite hian chan­chin­bu (newspaper) erawh an chhiar nasa thawkhat a, 68%-in newspaper an chhiar a, thla tin/kar tin chan­chinbu chhuak chi chhiarṭhin 18.32% an awm. Lehkhabu pang­ngai chhiar ṭhin erawh chu 27.58% chauh an awm a ni.

Lehkhabu chhiar hnuhnun ber zawhna khaikhawmnaah chuan, 'Kum khat aia rei tawha chhiar 15.37% an awm a, lehkhabu chhiar lai mek nei 48.63% an awm. Thla khat aṭanga thla ruk kal taa lehkhabu chhiar 33.89% awmin, thla ruk aṭanga kum khat kal taa lehkhabu chhiar 7.89% an awm bawk.

KṬP member zingah an hun âwl hman dan tlangpui zawhna chhanna khaikhawmnaah chuan, computer khawih ṭhin tam berin, 40% an ni a; 'Ka facebook ṭhin' ti 39% an awm a, awm mai mai 21.26% an leh lehkhabu chhiar ṭhin nia insawi 17.47 % an awm a ni.