Bornasury VC pian dan ennawn phût

MZP sub-headquarters, Tlabung chuan sorkarin Bornasury khua village council a pek dan thil dik lo a awm niin a hria a, Bornasury VC pian dan ennawn leh turin thuneitute an phût.

Tlabung MZP tarlan danin, Bornasury khua hi Lunglei district leh Lawngtlai district inrìnaa awm niin, CADC huam chhung a ni a, kumina Kurbalasora V/C aṭanga indang thar a ni. Bornasury khuaa mihring leh in awm zat enin, V/C hran pek ṭul lo leh sorkar tan sum sên belhna mai nia an hriat thu an sawi.

Tlabung MZP chuan, Bornasury-ah hian in 67 awmin, voter 123 an awm a, V/C thar siamah member pasarih, mipa paruk leh hmeichhia pakhat awm tura tih a nih thu an sawi a, "Khuaa in awm zat ngaihtuahin, V/C member pasarih an awm hi a mak a, endik leh turin sorkar kan ngen a ni," an ti.