MNF kum 10 sorkar aiin 500% chuangin Hna kan thawk tam tawh: Zodintluanga

Public Health Engineering (PHE) department chuan nimin khan Berawtlangah Review Meeting of Works hun an hmang a; khuallian, PHE minister Zodintluanga chuan, kum 2008-a Congress sorkar a din aṭanga tun thlenga PHE hnathawh chu MNF kum 10 sorkar chhunga an hnathawh aiin 500% chuangin a tam tawh niin a sawi.

Zodintluanga chuan, PHE hna-thawhte chu fakawm a tih thu sawiin, PHE officer-te chu hmasawn zel dan tur ngaihtuah zel turin a chah a, "Engineer rual in ni a, vawiina kan thlen chin hi kan duhtawk mai tur a ni lo. In ngaihtuahna châwl lo se, ngaihtuahna thar neia thil thar ngaihtuah zel turin ka duh che u a ni. Khawvela thiamna thar ṭhang chak tak hi ûm phâk mai ni loin, khawvel kal ruala kal turin ṭan lak zel a ngai," a ti.

PHE chuan tui sem leh khawl buaipui lam ringawt an ngaihtuah mah mah palh theih thu sawiin, Zodintluanga chuan, "A hming pawh Public Health Engineering a ni a, tui pek ringawt ni loin, hriselna lam hi kan ngaih pawi-mawh a ngai. Thianghlimna leh tui tihthianghlim lamah ṭang zual ila, thingtlang tui kan pekte a thianghlim tâwk tur a ni," a ti a; chumi tur chuan officer-te chu an naute fuiha enpui ṭha turin a chah.

PHE Minister chuan, tun hnai-ah PHE department-a offi-cer-te remhriatna azarah Aizawlah kângmei chhuah palha hman turin kangṭhelh motor-in tui an chawi theihna tur hmun 40-ah siam belh a nih thu a sawi. Tui meter chungchangah, "Smart metering kan hmang tawh dawn a, Aizawl leh district headquarters tinah hman tum a ni," a ti.

Minister Zodintluanga chuan, Mizoram hmun hrang hranga PHE hmalakna hawn mai theih tur a awm nual thu te, NLCPR hnuaiah project 10 leh NEC hnuaiah project pasarih kalpui a nih thu te, 10% GBS hnuaiah project panga kalpui mek a nih thute a sawi bawk.

PHE Review Meeting of Works hawnna inkhawm hi PHE secretary V Lalremthanga'n a kaihruai a; chawhnu lamah thupui hrang hrang sawihona leh an hnathawhte thlirhona hun hman a ni.