Sum hmang dik lote enliam theih an ni lo - COLFA

Committee on Local Fund Account (COLFA)-te chuan, nimin khan 13th Finance Commission sum aṭanga siam Thenzawl khaw chhunga V/C hnathawhte an enfiah a; COLFA hotute chuan, sum hmang dik lote chu en liam theih an nih loh thu an sawi.

COLFA-te hian Thenzawl Rest House-ah Thenzawl V/C-te an kâwm nghal a; COLFA chairman John Siam-kunga chuan, local body-te'n sorkar sum an hmannaah cashbook mumal lo te, voucher fel lote leh mahni thua hna kawih pênte a awm ṭhin thu sawiin, "Chutiang tih chíngte chu en liam mai theih a ni lo," a ti.

John Siamkunga chuan, sum hmang dik lote chu hrem an nih theih nan Anti Corruption Bureau leh Central Bureau of Investigation thleng pawha kal emaw, Assembly hmaa pharh mai emaw a nih ṭhin tur thu a sawi a; mipuite sum hmangtute chu dik tak leh dan ang thlapa kal tum
ṭhin turin a fuih.

COLFA member R Van-lalvena pawhin thu sawiin, "Mipuite an fing tial tial a, an thîkthu pawh a chhe tial tial. Sorkar sum dik lo taka hmangtute tan jail luh a sam ta riau mai a, dik takin danin a phût ang zela engkim kan tih a ṭul hle a ni," a ti.

COLFA member dang Lal-rinawma chuan, ram mi-puite sûkthlêk enin thil dik lo titute hrem an châk tih a hmuh theih tih sawiin, "Mipui sum hmangtute kan fimkhur a ṭul hle," a ti a; fund dawn reng reng a hman dan tur ruahmanna neih vek a nih avangin Finance Commission aṭanga sum hmuh pawh a hman dan tur hriat vek tum tur a nih thu a sawi.