Lungleia bank-te hnathawh thlirlet

Lunglei District Consultative Com­mittee/District Level Review Committee/District Level Security Committee chu nimin khan addl. DC R Vanrengpuia hoin DRDA conference hall-ah an ṭhukhawm a, an district chhunga bank-te hnathawh an thlirlet.

R Vanrengpuia chuan bank-te chu ram hmasawnna hnathawktu pawimawh tak an nih thu sawiin, bank manager kalkhawmte chu an Bank hmalakna apiangah mipui hmasawnna leh an hamṭhatna dah pawimawh hmasa ber ṭhin turin a chah a, "Kawng hrang hranga kan district ti hmasawn turin bank leh Line department ṭangkawpten theihtawp chhuaha hma an lak a ṭul takzet," a ti.

Meeting-a tarlan a nih danin, bank hrang hrangten bank security an neih bakah CCTV, fire extinguisher, alarm system leh police patrol log book-te dahin an enkawl ṭha. Currency Management-Remittance issues leh pawisa chhia thleng chungchangah bank-ah harsatna a awm lo.

Credit Deposit Ratio (CD Ratio – Bank in Deposit a dawn aṭanga loan a pekchhuah zat) chu March 2020 ah 53.22% niin June 2020 quarter-ah 46.98% a ni. National Benchmark 60 % phak tura tih anih laiin target kan pha lo hle a, ṭan lak a ngaih thu tarlan a ni. 

Prime Ministers Employment Gene­ration Programme - PMEGP ah hmalakna a ṭha thawkhat a June 2020 quarter-ah cheng nuai 38. 56 loan pekchhuah a ni.