Covid-19: Mizoram dinhmun Hripui vei 47 hmuh belh a ni

September 23, Nilaini khan Mizorama Covid-19 vei mi 46 hmuh chhuah a ni a, an zingah Mizoram chhunga kái chhâwng an awm nual. Nimin khan mi pakhat hmuh chhuah belh a ni bawk. Hripui vei hmuh tawh zat chu mi 1,760 an ni a; nimin khan hripui veite enkawlna hmun aṭangin mi pakua chhuahtir an ni.

Covid-19 vei Nilainia hmuh chhuahte chu - ZMC laboratory-a hmuh chhuah mi 33, Lunglei Civil Hospital laboratory-a hmuh chhuah mi 11, Mamit District Hospital-a hmuh chhuah mi pakhat, leh Rapid Antigen Test hmanga Serchhip district-a hmuh chhuah mi pakhat an ni a; mipa 38 leh hmeichhia pariat niin, Covid-19 symp­tom nei an awm lo.

Covid-19 vei dam tawh nimina mi pakua chhuahtirte chu State Referral Hos­pital-a enkawl vek an ni. Sorkar thuchhuah chuan, September 23-a chhuak zatah tihsual a awm a, mi 27 ni loin, mi 22 zawk an nih thu a tarlang. Mizorama Covid-19 vei hmuh chhuah tawh mi 1,760-te chu mipa 1,433 leh hmeichhia 327 an ni a; an zinga mi 1,099 (62.44%) chu chhuahtir tawh an nih laiin, mi 661 (37.56%) chu enkawlna hmunah an la awm. La chhuak lo zingah hripui vei tawh lo an awm nual bawk.

Nimin khan RAT hmangin Covid-19 vei hmuh chhuah belh a ni. Sorkar thuchhuah chuan, Zarkawt venga mipa kum 46 a nih thu tarlangin, "Symptom nei lo a ni a, a fapa Covid-19 positive CCC-a enkawl lai mek awmpuitu a ni a, chuta ṭanga kai chu a ni," a ti.

September 23, Nilainia Covid-19 vei hmuh chhuah mi 46 zinga 33 chu ZMC Covid-19 Laboratory-a RT-PCR hmanga swab sample endik aṭanga hmuh chhuah a ni a, mipa 25 leh hmeichhia pariat an ni. TrueNAT-PCR hmangin Lunglei Civil Hospital (LCH)-ah mipa 11 leh Mamit District Hospital-ah mipa pakhat leh, Rapid Antigen Test (RAT) hmangin Serchhipah mipa pakhat hmuh chhuah a ni bawk.

Sorkar thuchhuah tarlan danin, ZMC laboratory-a hripui vei hmuh chhuah mi 33-te chu Aizawl district-a mi vek an ni a, tun September thla ni 16, ni 17 leh ni 21-a swab sample lakte an ni. Mi 33-te zinga mi 31 chu Mizoram chhunga kái chhâwng an nih laiin, mi pakhat chu state páwn aṭanga tun hnaia rawn lut, quarantine centre-a awm lai an ni thung.

LCH laboratory-a Covid-19 vei hmuh chhuah thar mi 11-te chu BSF sipai vek, kum 28-57 inkar an ni a; tun hnaia state pawn aṭanga rawn haw, quarantine facility-a awm lai vek an ni. Mamit District Hospital laboratory-a hmuh chhuah pakhat chu kum 26 mi, tun hnaia West Bengal aṭanga haw, quarantine facility-a awm lai a ni.

September 23 veka RAT hmanga Serchhipa Covid-19 positive hmuh chhuah pawh BSF sipai kum 51 a ni a; state pawn aṭanga rawn lut, quarantine facility-a awm lai a ni bawk. September 23 khan Mizoramah mi 2,029-te swab sample endik a ni a; ZMC laboratory-a sample 1,381, TrueNAT-PCR hmangin district dang pariatah sample 163 leh RAT hmangin district pangaah sample 475 endik a ni.