Ruma Enterprise dàwr lo turin ngen

All Mizoram Cement & Iron Rod Dealers Association (AMCIRDA) chuan thuchhuah siamin, Mizoram tana Lailapur-a harsatna siamtu, a bul tumtu ber Rajib Uddin Laskar-a dawr, Ruma Enterprise chu dawr tawh lo turin Mizoram mipui an ngen.

AMCIRDA tarlan danin, Lailapur-a Ruma Enterprise neitu Rajib Uddin Laskar (Raju tia hriat) chu tun hma aṭang tawhin Mizoram leh Assam inrina bawr vela buaina chawk chhuaktu ber leh buaina awm apianga a meizang hlaptu ber a ni. Ruma Enterprise-ah in sakna bungrua rod, cement, etc. a zuar a, Star Brick siamna industry neitu a ni bawk.

Ruma Enterprise chu dawr tawh lo tura Mizoram mipui ngenin AMCIRDA chuan, "Star brick pawh tu ma'n la lut lo a, lei tawh lo turin mipui kan ngen a ni," an ti a; cement leh iron rod zuar Mizo sumdawngte chu Star brick zuar tawh lo turin an hriattir tih an sawi.

AMCIRDA tarlan danin, Rajib Uddin Lasker hian Mizoram registration hmangin lirthei a nei nual niin an hria a; chungte chu - MZ-05 A-2884, MZ-05 A-2885, MZ-09 A-2712 leh MZ-01 T-8159 te a ni. A thurualpui Nasir Uddin Laskar pawhin Mizoram registration hmangin lirthei a nei nual a, chungte chu - MZ-05 A-2955, MZ-05 A-3067, MZ-05 A-3127, MZ-05 A-5383 leh MZ-05 A-5771 te a ni.

"Heng kan tarlan Mizoram registration ni si, a neitu dik tak vai ni bawk hi an motor registration titawp turin sorkar thuneitute kan ngen nghal a ni," AMCIRDA chuan an ti.