Sum bat avangin hna chawlhsan Thawh chin aia tam bill siam a ni?

Khanpui-Tualbung kawng laihna atana sum hmuhna, Non Lapsable Pool of Central Resources (NLCPR) chuan third instalment thleng a pe chhuak tawh a; mahse, contractor sum Mizoram sorkarin a bat avangin thawh chhunzawm a ni lo. Hetih lai hian, hna thawh chin aia tam bill siam nia hriat a ni.

Kawng siamtu contractor chuan Khanpui lam aṭangin hna a thawk ṭan a, Tualbung lamah chuan hnathawh hmuh tur a la awm lo. Sorkarin sum a batsak avangin contractor hian hna a thawk chhunzawm lo nia thu dawn a ni.

PWD hotute chuan zawhna chhangin, NLCPR aṭanga pawisa hmuh ṭhat a nih loh avangin contractor hnenah pawisa pek tur an neih loh thu an sawi a, "Contractor hian Court-a khinte min tum a, mahse, Mizoram sorkar mawhphurhna a nih loh avangin tih theih kan nei lo. Pawisa min pek miau loh chuan tihngaihna a awm lo," an ti.

PWD hotute sawi danin, bill siamnaah hnathawh chin aia tam siam nia hriat a ni a, hei vang hian a ṭul dan azira hnathawh chin teh
ṭhat leh tum a ni. Hei bakah hian, helai kawng leh hmun dang huam telin, project lian zawk siam a ni a, DoNER-ah thehluh tawh niin, an pawm dawn leh dawn loh hriat a ni lo.

Hetihlai hian kawng siamna atana pawisa hmuhna NLCPR chuan pawisa ṭum thum a sanction tawh a, a vawi khatna chu NLCPR webiste-ah a awm tawh loa, a vawi hnihna chu ni 24.3.15 khan a ni a, cheng nuai 29.84 sanction a ni. A vawi thumnaah chuan cheng nuai 24.87 sanction a ni a, sanction hun chu ni 17.11.2015 a ni.

Khanpui-Tualbung kawng siamna atan hian cheng nuai 138.12 ruahman a ni a, heta ṭang hian NLCPR aṭanga hmuh tur chu cheng nuai 124.31 (90%) niin, a bak nuai 13.81 (10%) chu Mizoram state sorkarin a tum tur a ni.

Zawhna chhangin Tualbung khawtlang hruaitute chuan, "Kan khaw lamah chuan hmalakna hmuh tur a la awm lo a, Khanpui lam aṭang chuan hnathawh ṭan a ni tawhin kan hria," an ti.

Khanpui aṭanga thu dawn danin, kawng hi km. 5 vel laih a ni tawh a, hmun ṭhenkhatah kawr siam a nih bakah, hume pipe phûm a ni a, mahse, a chhe leh vek tawh. Hna hi nikum kum tawp lam aṭangin thawh a ni tawh lo a, kuminah chuan thawh chhunzawm a ni tawh lo hrim hrim a ni.