Mizoram chhunga Covid-19 kai mi 31 hmuh chhuah belh

September 23, Nilainia Mizorama Covid-19 vei hmuh chhuah mi 46 zingah Mizoram chhunga kái chhâwng (local positive contact) mi 31 an awm. Local positive contact-te hi Aizawl district-a mi vek an ni a, district dangah an la awm ve lo.

Covid-19 vei Nilainia hmuh chhuah, Mizoram chhunga kái nia hriat mi 31 zinga mi panga chu Vishal Megamart, Bawngkawna thawk an ni a; anni hi September 21, Thawhṭannia swab sample lakte an ni. A hmain Vishal Megamart-a thawk zingah hripui vei mi pakhat hmuh a lo ni tawh a, hripui veiin a tlawh vanga kái chhâwng an nia hriat a ni.

Hripui vei mi pariat hmuh chhuah tharna veng, Edenthar Veng LTF hruaitute chuan, an veng mite chu a hmaa hripui vei an neih tawh zinga mi pathumte contact tracing aṭanga swab sample endik an nih thu an sawi a, "Covid-19 positive pathum kan neih tawhte kha local council inthlana duty-te an ni a, tuna hmuh thar mi pariat zinga a ṭhen hi chu secondary contact-te an ni," an ti. Positive hmuh thar zinga pakhatte chhungkuain Nilaini khan chhiat an tâwk a, mitthi vuinaa kalte chu an chhui zui vek thu an sawi. 

September 23-ah Ṭhuampui vengah hripui vei mi 17 (mipa 12 leh hmeichhia 5) hmuh thar a ni a, an vaiin local positive contact an ni. An veng LTF hruaitute sawi danin, positive hmuh thar zingah LTF Chairman leh member/volunteer dang 10 an tel. LTF hruaitute sawi danin, LTF Chairman chu a nupui vanga sample test a ni a; a nupui chu zirtirtu niin, an hna thila meeting-ah Covid-19 positive a tel ve avangin an sample endik a ni a, amah a positive laiin, a nupui a negative thung. LTF member dangte erawh chu an rinhlelhawm vanga endik an ni lo a, LTF-a duty ṭhin an nih vanga endik niin, an kai chhan àwm an hre chiang thei lo. Ṭhuampuia hripui vei hmuh thar zingah hian September 4, 2020-a veng pakhat local council inthlana duty a tel bawk.