Registration of Births & Deaths hna AMC-in nimin aṭangin an thawk ṭan

Aizawl Municpal Corporation (AMC) chuan, nimin aṭang khan Aizawl khawpui chhunga nau piang leh mitthi chhinchhiahna, Registration of Births & Deaths an thawk ṭan.

AMC-in Registration of Births & Deaths hna an thawh ṭan pual hian nimin khan AMC Auditorium-ah a hawnna inkhawm buatsaih a ni a; Economics & Statistics director, addl. chief registrar of Births & Deaths ni bawk Vanlalrema chuan AMC commissioner Dr H Lalthlangliana hnenah mawhphurhna a hlan.

Hna inhlanna inkhawma khual-lian, Dr C Vanlalramsanga, Planning secretary leh chief registrar of Births & Deaths chuan, Aizawl khawpuia nau piang leh mitthi chhinchhiahna hna hautak tak AMC kuta hlan a ni chu hna tak tak thawk thei tura sorkarin AMC a rinzia tilangtu a nih thu leh, mawhphurhna thar chu AMC-in ṭha taka an hlen chhuah a beisei thu a sawi.

Aizawl mayor PC Lalhming-thanga pawhin thu sawiin, sorkarin AMC a rin tawkna a tilang chu lawmawm a tih thu leh, subject tam zawk AMC kuta a puma hlan zel a nih a beisei thu a sawi.

AMC-in nau piang leh mitthi chhinchhiah hna a thawh turah hian AMC superintendent H Lalruatliana chu assistant district registrar of Births & Deaths atan ruat a ni a; AMC building first floor-ah a hranpain office siam a ni.

Hetih lai hian, pian tirha birth certificate siam nghal ni lo, pian hnu fêa birth certificate siamna atana pawimawh registration titawhte chhinchhiahna chu Economics & Statistics department-in a la peih fel loh avangin hun eng emaw chen chu Economics & Statistics office pan hmasak phawt a ngai tih an sawi.