JE natna laka lo inven lâwk nan Sentinel Site Hospital ruahman

Health department hotute chuan, nimin khan principal director Dr K Ropari hoin a pisaah tunlaia Manipur Churanchandpur district leh a chhehvela natna hri léng mek, Japanese Encephalitis (JE) laka invên dan tur leh hmalak zel dan tur an sawiho a; JE hmuhchhuah leh finfiahna hmun, Sentinel Site Hospital atan Aizawl Civil Hospital ruahman mek a nih thu sawi lan a ni.

Meeting-ah hian Health Services director Dr Ro-hmingthanga Ralte, State Mass Education & Media, State Vector Borne Diseases Control Programme leh Integrated Diseases Surveillance Programme (IDSP) hotute an tel a; JE natna chu Mizoram dep Churrachanpur district-ah a len avangin Mizoramah invenna a rang thei ang bera kalpui a ngaih thu an sawi.

Meeting chuan, JE hmuhchhuah leh finfiahna hmun Sentinel Site Hospital atan Aizawl Civil Hospital thlan niin, rua-hman mek a ni tih an tarlang a, "Hetah hian a hmuh chhuahna kháwl leh thawktu dah fel tawh an ni," an ti.

JE natna dinhmun zir chiang tur leh a invenna kawng hrang hranga hma la turin ṭhenawm state ramri depah expert group tirh an rêl a; expert group chuan thosi zir chianna an neih dawn bakah, invenna kawnga mipuite zirtirna an nei nghal ang.

Health department hotute chuan, JE natna vang-in mipuite chî-âi lo turin an chah a; JE natna chu ṭhenawm state-a lêng a nih vang chauha lo invên nan kawng hrang hrangin hma lo lak lâwk mai a nih thu an tarlang.

Meeting-a thurel dangte

1. Mipui hnehah JE natna leh inven dante thuchhuah (pamphlet, leaflet) sem a ni dawn.

2. Thosi seh lakah invenna tur kawng hrang hranga sorkarin hma a lakna, thosilen chiah sa leh chiahna tur sem, thosi kah leh thosi pian theihna tui tling tihbo kawngah tun aia chaka hmalak an rel.

3. Mihring chenna mai ni loin, khawlai leh ran in leh a chhehvelah space spray (fogging) neih a ni dawn.

4. Ramri depa health centre leh damdawi-ina thawktute natna chungchang zirtirna bik pek an ni ang.