AYUSH Hospital-ah OPD kalpui ṭan

Integrated AYUSH Hospital, Thenzawlah nimin khan inentirna, Out Patient Department (OPD) kalpui ṭan a ni a; official-a hawn hun tur erawh sawi theih a la ni lo.

AYUSH Hospital OPD-a inentir ṭan ní-ah hian mi 128 an inentir a; chungte chu mipa 33, hmeichhia 63 leh naupang 32 an ni. Damlo admit theih ni tawh mah se, admit erawh an awm lo.

AYUSH Hospital hi official a hawn a la ni lo a, chuti chung chuan a mamawh tana pan theih turin hawn ṭan a ni a; nimina inentirte hnenah pawh damdawi an neih ang angte a thlawnin an pe chhuak a ni. Damdawi-inah hian Ayurvedic doctor pathum leh Homoeopathic doctor 4 an awm.

AYUSH Hospital-a resident medical officer Dr HT Zothanmawia chuan, damdawi-in chu peih vek a ni tawh a, thawktute pawhin July 1, 2016-ah hna an zawm tawh tih sawiin, "Sorkar hotute'n ti tura an tih angin, vawiin aṭangin OPD kan hawng a, admit ngai pawh kan admit thei tawh," a ti a; damdawi-in chu official-a hawn hun tur erawh chu an la hriat bik loh thu a sawi.