KHAWTHLIR

LC bye-election

State Election Commission (SEC) chuan, Chhinga Veng, Chite leh Mission Veng local council bye-election neih hun atan August 26, 2016 a ruat. Bye-election-ah hian zing dar 7 aṭanga tlai dar 5 thleng vote thlak a ni ang a, vote thlak zawhah vote tlate chhiar nghal tur a ni.

Thisen pe

DIET, Lawngtlai zirlaite chuan, nimin khan Lawngtlai District Hospital tan thisen unit 24 an pe a, a petute mipa 21 leh hmeichhia pathum an ni.

MHIP-in dem

MHIP general hqrs. chuan thuchhuah siamin, July 31, 2016 zana Darngulliana (49) s/o Lalliansuaha, Kelsih-in a nupui Vanlalhnemi (30) a that chu pawi an tih thu an tarlang a, "Hmeichhiate hi eng ang mi pawh ni se, áwm ném leh chak lo zawk kan nih vanga kutthlak leh thah hial kan tâwk ṭhin hi kan dem tak zet a ni," an ti. Darngulliana chu dan anga hrem an phût thu an sawi.

CTP khawmpui

Champhai Ṭhalai Pawl (CṬP) chuan nimin khan Kahrawt YMA Hall-ah inkhawmpui an hmang a; resolution pahnih, 'Hun rei tak Champhai Tlangsama polytechnic building sak zawh tawh tun thlenga luah loha a awm reng hi sorkarin hma la vat rawh se' tih leh, 'Champhai District Hospital-a thawktu indaih lo phuhru tur leh nursing school hi a rang thei ang berin sorkarin min hawnsak rawh se' tihte an pass.

In saksak

July 28, 2016-a Champhai district Ngur khuaa leiminin in a hnâwlsak, Suanlala chu khaw-tlangin in an saksak.
In sakna atan hian Ngur khuain a châk an thawh khawm a, Champhai leh a chhehvela mi ṭhahnem-ngaite'n in sakna tur bungrua an thawh. In hi Assam type a vâng ft. 18 leh a dung ft. 30-a zaua sak a ni.