MPC party-in - Receipt awm loa bawng lei enfiah phût

MPC party chuan thuchhuah siamin, AH&Vety department-in bawng lak luhna atan receipt hmuh tur awm loa Rs. 2,95,60,000 an hmang chu eirûkna remchang-a an ngaih thu an puang a; enfiah thuai turin Chief Minister an phût.

MPC office bearer-te nimina an party pisaa an president Lalhmangaiha Sailo hoa ṭhukhawm chuan resolution pass in, "AH&Vety department-in bawng lak luhnaa Rs. 2,95,60,000 zet receipt awm loa an hmang ral hian eirukna remchang tak insiamnaah kan ngai. Hetianga awmze nei loa sum hman hi sim tawh turin sorkar kan ngen a ni," an ti.

MPC party resolution chuan, sorkar chu dan kengkawh tur leh dan bawhchhiate hrem tur a nih laiin, dan bawhchhiain Myanmar aṭangin PRRS hri vei vawk an la lut niin a tarlang a; PRRS vanga vawk vulha eizawngte vanduaina leh chhiatna tawkte chu chhawmdawlna pe ngei tur leh, chhawmdawlna pek tuma inbuatsaihna kal mek chu a rang thei ang bera tihhlawhtlin a nih theih nan chak taka bawhzui turin sorkar an ngen.

Mizoram chu India rama state pachhe berte zinga mi, mahni kea ding zo lo a ni tih sawiin, MPC chuan, "Sorkar laipui rinchhana ke pên ve ṭâwk ṭâwk kan nih hre chang loa Mizoram sorkarin sum ren lo taka a hman thin vanga mipuiin kawng hrang hranga buaina leh harsatna kan tawh ṭhin a ziaawm theih nan thiam taka sum hmang ṭhin tawh turin Mizoram sorkar kan ngen a ni," an ti bawk.