MNF hi BJP tuipuiah a pil mek: Lalduhoma

ZNP president Lalduhoma chuan, MNF-in North East Democratic Alliance (NEDA) an zawm chungchang sawiin, "MNF hi BJP tuipuiah a pil mek a, an mipui zingah NEDA zawm duh lo an tam hle," a ti.

Nimina ZNP pisaa inkhawmah thu sawiin Lalduhoma chuan, "MNF party, inti nationalist em emte'n NEDA chu sam an phiar zawm a, hei hi an chhiatna tur bul a ni," a ti a; MNF-a mi tam takin BJP kaihhruai NEDA chu zawm an duh lo niin a sawi.

Lalduhoma chuan, kohhran duh loh zawng policy vuantute an thawhpui ve thei lo tih sawiin, "Hemi aṭanga kan fihlîm ta hi kan thla a muang a, kan hnam tan, kan sakhaw tan thil pawi lo thleng ta se, MNF hi chuan an do ngam dawn lo tihna a ni,” a ti.

Inthlan dawn apiangin district thar hawn belh sawi a awm ṭhin tih sawiin, Duhoma chuan, “District thar neih hi kan do tihna ni loin, neih belh a ṭul ber em, tih hi ram pumpui huap rilru zau zawk nen kan ngaihtuah tur a ni. Ngaihtuahna zau zawk hmang turin Mizoram sorkar kan duh a ni," a ti a, kum 1998 inthlan dawna Congress sorkarin district thar panga an puan leh kum 2008 inthlan dawna MNF sorkarin district pathum a puante chu tun thlengin a nih tur anga thuam an la nih loh thu a sawi.