KHAWTHLIR

Champhai police (DEF) chuan nimin khan Police Commemoration Day pual leh duty laia police thite hriatreng nan thisen pek rûnpui an huaihawt a; Champhai SP Rex Zarzoliana Vanchhawng hoin police mipa 14 leh hmeichhia pangate'n Champhai District Hospital tan thisen unit 19 an pe. Champhaiah vek hian Thawhṭanni khan Wesleyan Methodist kohhran ṭhalaite'n thisen unit 25 an pe a, petute mipa 19 leh hmeichhia paruk an ni.

Excise & Narcotics department (END) chuan October 20, Thawhlehni khan Mizoram Liquor Prohibition Act 2019 hman hnua dan kalha sap zu an mante chu Bethany Multipurpose Farm, Phunchawngah an leihbua. Zu leihbuakte hi Whiskey (brand hrang hrang) ûm puitling (750 ml) 2,334, ûm chanve 1,143, Rum ûm puitling 2,523 leh ûm chanve 84 leh beer ûm 56 leh can 243 a ni a; tualchhung hralhna angin Rs. 56,56,400 man a ni.

Mizoram leh Assam ramria buaina chhuak vanga hliam Malsawmkima, Vai­rengte kanna atana Chief Minister-in a discretionary fund aṭanga a sanction Rs. 50,000 chu Thawhlehni khan CM aiawhin Kolasib DC Dr H Lalthlangliana'n Kolasib District Hos­pital-a enkawl mek Malsawmkima hnenah a hlân.

State Referral Hospital-ah (nimin tlai dar 4 dinhmun angin) Covid-19 vei mi 42 enkawl mek an ni a, ICU-a awm zinga pakhat chu nimin khan ward-ah sawn a ni. SRH-ZMC Bulletin tarlan danin, ICU-ah hian mi pathum enkawl mek an ni a, an zinga pakhat chu ventilator hmantir zel niin, mi dang pahnih chuan hma an sawn. Isolation ward-a awm mi 39 zingah ngaihtuahawm an awm lo.

Nimin chawhnu dar 2:30 vel khan Zairemmawii, Durtlang Leitan in, chhungkaw dangin an luah lai chu a kâng a, bungrua chuh hman lohin a kâng ral. Kangmei chhuah ṭan laiin inah awm an awm lo. Leitan Branch YMA chuan vawiin hian hnatlangin in an sa ṭha dawn a ni.