Lalduhoma paihthlak tumna hi Mipui zah lohna a ni - Lal Thanhawla

Mizoram Pradesh Congress Committee (MPCC) president Lal Thanhawla chuan, MNF party aṭanga MLA eng emaw zatin Lalduhoma, MLA aṭanga paihthlak tuma Assembly Speaker hnena an hék chu Serchhip bial mipui bakah, Mizoram mipui zahlohna leh pawisak lohna lian tak a nih thu a sawi.

Hawla chuan, MNF MLA-te'n an MLA pui Lalduhoma an hekna avanga Mizo Kristian-te hming a chhe zawnga hriatreng a ni tur chu pawi a tih thu a sawi. Lal Thanhawla hian nimin khan press statement a tichhuak a; ZPM MLA-te chu inthlanah independent-a ding ni mah se, a hma aṭanga ZPM hming veka kal an nih tawh avang leh Election Commission of India (ECI)-a registration la nei lo an nih vanga independent-a ding an ni tih an pawm thu sawiin Lal Thanhawla chuan, "Congress party tan ZPM hi hnawksak viauin lang mah se, mipui thlan tlin an nih miau avangin Pu Lalduhoma leh a thawhpui MLA-te hi ZPM MLA-ah Congress party chuan kan pawm thlap a ni," a ti.

MPCC President-in a tarlan danin, kum 1987-a MLA inthlanpuiah MNF party-in Election Commission of India (ECI) registration an la neih loh avangin independent vekin an ding a, Assembly seat 24 lain sorkarna an siam zui a ni. MNF dinhmun hrethiam takin Congress leh PC party-te'n an pawm a, an thîk lo a, an hêk buai lo. Lal Thanhawla chuan, kum 1989 MLA inthlanpuiah MNF(D)-in ECI registration an la neih loh avangin independent-in an ding a, Assembly seat pahnih an la a, an tlinna bialahte pawh anmahni ṭantute siam zuiin, member tharte an làwm lut tih a sawi a, "Ram tana thawkho kan nih avangin an dinhmun hrethiam takin, ṭha takin kan en a, tihchhiat emaw, hêk emaw kan ngaihtuah lo. Ram hmasawnna kawngah ṭha takin kan thawkho mai a ni," a ti.

MPCC President Lal Thanhawla chuan, dan bawhchhiatna lian tak a awm vanga MLA aṭanga inchawlhtirna a awm chuan, tu tan mah hriatthiam loh tur a awm loa a hriat thu sawiin, "Thil kalphung lang chiang sa reng, mipui pawhin an pawm thlap thil ching pawr lui a, ram leh hnam hmasawnna leh ram tana thil ṭha zawk tur ngaihtuah vang pawh ni loa mahni thawhpuite paihthlak tuma hmalakna hi ka dem a ni," a ti a; politics chu thianghlim taka kalpui zel ṭha a tih thu a sawi.

Congress party President chuan, MNF MLA-te thil tih dan chu Mizorama politics kalpui dan tur a ni loa a hriat thu sawiin, "Mizo Kristian, kohhrana rawngbawltute tan phei chuan mi dangte chhiatna tur ringawt ngaihtuaha hmalak hi thil tih loh tawp tur a ni," a ti.Lal Thanhawla chuan, Isua'n, 'Miin in chunga an tiha in duh tur ang zelin mi chungah pawh ti ve rawh u,' (Luka 6:31) a tih thu sawiin, "Hei hi politics-ah pawh kan innghahna tur ni zel se. MNF MLA-te hmalakna vanga Mizo Kristiante hming a chhe zawnga hriat reng a ni tawh tur hi pawi ka ti hle a ni," a ti bawk.