Mizo ṭhalaite'n eizawnna tling theihna an nei - LESDE Minister

Labour, Employment, Skill Development & Entrepreneurship (LESDE) minister Lalnghinglova Hmar chu nimina Shillong-a buatsaih Northeast Skill & Entrepreneurship Conclave 2024-ah a tel a; Mizo ṭhalaite’n infiamna, rimawi, khualchhawn lam, beauty & wellness, service leh thil dangah eizawnna tling thiamna leh theihna an neih thu a sawi.

Northeast Skill & Entrepre-neurship Conclave 2024 hi Shillong-a Indian Institute of Management (IIM) auditorium-ah neih niin, sorkar laipuia Ministry of Skill Development & Entrepreneurship (MSDE) leh Indian Institute of Entrepreneurship (IIE), Guwahati buatsaih a ni a; Union MSDE minister Jayant Chaudhary-a'n a hmanpui.

Lalnghinglova Hmar chuan, "Mizo ṭhalaite’n infiamna, rimawi, khualchhawn lam (hospitality), beauty & wellness, service leh thil dangah eizawnna tling thiamna leh theihna (skill) an nei. Sorkar laipui hnuaia skill development scheme-ahte India ram pum hrût rual loin, Mizoram leh hmarchhak state danga ṭhalaite tuina leh thiam zawng mila kalpui a pawimawh," a ti a; state tinte chu an ṭhalai leh mipui azira job role thlanga kalpui turin zalenna zau zawk pek a rawt.

Ṭhalaite theihna tihmasawn a, hlawhtlinna tluantling an neih theih nan hmarchhakah skill training centre changtlung neih belh a pawimawh thu sawiin Lalnghinglova chuan, "Mizo ṭhalai eng emaw zatin eizawnna atan infiamna an hmang mek a, intihhlimna mai ni lo, eizawnna tling, pawimawh leh thawh hlawk tak a ni tawh. India-in Olympic 2036 thlen a tum avangin infiammite leh infiamna kaihhnawiha awmte hmasawn nan tun aṭangin thiamna leh theihna tihpun ngaih pawimawh a ngai," a ti.

LESDE secretary Lalmalsawma Pachuau pawhin thu sawiin, Mizorama thiamna tihhmasawn lama hmalakna leh hmasawnna turte a tarlang a; Mizo ṭhalaite’n kut themthiam kawngah theihna sang tak an neih thu sawiin, "Kumin kum tira IndiaSkills Competition-ah Mizoramin medal pali leh Medallion of Excellence pali a la a, medal leh medallion latu zinga pangate hi ITI leh Women Polytechnic chhuak an ni," a ti a; mahni kea din tumte chawi kâng turin Mizoram sorkarin chak taka hma a lak thu a sawi.

Union MSDE minister Jayant Chaudhary chuan, India chu ram zau tak, a mi chengte pawh inang lo tak tak an nih avangin skill development & entrepreneurship chu state-te nen inráwn chunga kalpui a ngaih thu a sawi a, "Hmarchhak state hrang hranga Skill Development & Entre-preneurship minister leh official-te thawhhona, inpekna leh ngaihdan ṭha tak takte hi a lawmawm a, chona min pe a ni," a ti.

Jayant Chaudhary chuan, Industrial Training Institute-te chu thiamthil inzirtirna pawimawh a nih avangin sorkar laipuiin a ngai pawimawh tih sawiin, "ITI 1,000 tihchangtlunna tur kalpui mek a ni. Sorkar laipuiin hmarchhak state-te a ngai pawimawh a, Conclave-a rawtna hrang hrangte hi tihhlawhtlin dan ngaihtuah a ni ang," a ti a; mipui rilruah themthiamna pawimawhna tuh turin skill competition tam zawk buatsaih a pawimawh thu a sawi.

Union Minister hian Indian IIE, Guwahati kaltlanga hmarchhak state-a Entrepreneurship Development Centres 30 din tharte a hawng a; MSDE director Pritam Dutta chuan hmarchhak state-a Ministry of Skill Development & Entrepreneurship hmalaknate a tarlang. Hmarchhak state pariatte skill development leh entrepreneurship dinhmun tlangpui leh hmathlirte thlirho a ni bawk.