Voluntary Blood Donation Day hmang

Nimin October 1 kha National Voluntary Blood Donation Day a ni a, Mizoram hmun ṭhenkhatah hman a ni. Aizawlahchuan Mizoram State AIDS Control Society (MSACS) leh Association for Voluntary Blood Donation buatsaihin Chanmari YMA Hall-ah hman a ni a, sikul ṭhenkhata zirlaite leh zirtirtute an tel.

Aizawla National Voluntary Blood Donation Day hmanna inkhawmah hian MSACS joint director (Blood Safety Division) Dr Shahnaz Zothanzami inlawmna thu a sawi a; a kaihhruaiin National Voluntary Blood Donation Day thutiam sawi rual a ni.

MSACS assistant director F Lalmuanpuii'n 'Voluntary blood donation & HIV' tih thupui a sawi a; MSACS ICTC counsellor Lalruatsaki'n 'Risk behavior for HIV/AIDS', Lalnunpuia Hrahsel-in 'Life skills for students', Synod Hospital SUD&HIV consultant Dr Lalchhanhima'n 'Healthy lifestyle' leh David Lalremruata, Mission Vengthlangin 'Gateway drugs' tih thupuite an sawi bawk.

Mithiamte'n thu an sawinaah, tunlaiin ṭhalai zingah HIV kai thar an tam thu te, HIV veite enkawlna damdawi a ṭhat tawh avangin HIV kai hlau lo an tam tawh nia a lan thute an sawi a; zirlaite chu vawi khat tih chhin vanga HIV kai thei an ni tih inhriaa fimkhur taka an ṭhat lai hun hmang turin an chah.

Voluntary Blood Donation Day hi Lungleiah chuan Lunglei College multi-purpose hall-ah zirlaite nen hman a ni a, Lawngtlaiah pawh hman a ni bawk.

National Voluntary Blood Donation Day hi Indian Society of Blood Transfusion and Immunohaematology bultumin kum 1975-ah hman ṭan a ni a; kumina thupui chu 'Celebrating 20 years of giving: Thank you, blood donors. Be different: Donate blood, blood donate life' tih a ni.