Pangngai taka nun hmang turin Chief Minister-in zirlaite a chah

Chief minister Lalduh­oma chuan nimin khan a bial chhunga Serchhip Sports Complex-ah Serchhip District Secondary School Sports Meet 2024 a hawng a; mi chungchuang nih harsa mah se, mi pangngai nih a har lo tih sawiin, pangngai taka an nun hmang turin zirlaite a chah.

CM Lalduhoma chuan, tunlaiah sualna a pung nasa tih a sawi a, "Serchhip khawpui pawhin kan tuar hle tih kan hria. Zirlai duhawm tak takte hi chuan pangngai takin in nun rawn hmang ang che u. Mi chungchuang nih a har a ni thei a, mi pangngai nih erawh chu thil harsa a ni lo. Nun kawng pangngai tak zawh u la, in taksa, in rilru leh in thlarau tan chu chu malsawmna a ni dawn a ni," a ti.

Serchhip district-in tun hnaiah infiamnaah hma a sawn nasa tih sawiin Lalduhoma chuan, "Badminton, football, boxing, taekwondo leh discipline ṭhenkhatah India rama lang phak kan nei nual a, a lawmawm hle. Sorkar hnaah kan vaia luhna tur a awm loh avangin kawng danga talent ṭha tak tak neite chuan lo tipung u la, bei zel rawh u. Kan ṭhalaite hi sorkar chuan a thlahthlam ngai dawn lo che u," a ti a; infiamna hmunhmate a theih ang angin sorkarin a thuam ṭhat zel dawn thu a sawi.

Serchhip District H/S Sports Meet-ah hian inelna mipa tan 19 leh hmeichhe tan 17 a awm dawn a, sikul 19 aṭangin zirlai infiammi 600 vel an tel a ni.