Kumina SHC inthlan awm turah ZPM leh HPC thawk dun dawn

ZPM leh HPC party-te chu kumina Sinlung Hill Council (SHC) inthlanpuiah an thawk dun dawn a; an candidate-te vote turin SHC huam chhunga mipui an sáwm.

ZPM president Lalliansawta chuan nimin khan Aizawl Press Club-ah thuthar thehdarhtute kâwmin, SHC inthlanpuiah HPC nen an thawh dun dawn thu a puang a; kum 2023 MLA inthlan hmain thawhhona thuthlung an ziak tawh tih sawiin, "2023 MLA inthlanpuiah khan bial pathum Serlui, Tuivawl leh Chalfilh bialahte kan lo thawkho tawh. Thuthlungah khan 2024-a SHC inthlanpuiah thawhho zel ni se kan ti a, kan inbe chho zel a, duh dan leh beisei dan inang lote siam rem zelin, thawkho thei tur hian lungrual takin thutlukna kan siam thei ta a ni," a ti.

Lalliansawta chuan, SHC-in a huam MLA bial pahnih - Serlui leh Tuivawl chu MNF MLA awmna a nih thu sawiin, "ZPM a sorkar hnuah ZPM-in nasa takin heng bialahte hian hma a sawn a, khaw hrang hrangah tunah chuan member-ah pawh ZPM hi a tam ber kan lo ni chho ta zel," a ti a; ZPM-in MNF an khûm tawh thu leh Congress chu pathumnaah hniam takin an awm zel dawna a lan thu a sawi.

SHC-a ZPM leh HPC thawkho chu thláwp tur leh vite tura mipui sáwmin Lalliansawta chuan, "State-ah ZPM-in sorkarna a chelh mek a, SHC-ah ZPM leh HPC ṭang dunte kan sorkar leh chuan hmasawnna kawngah chak leh zualin kan thawk thei dawn a ni," a ti.

ZPM President chuan, kumina SHC inthlanah ZPM leh HPC thawhhonain Hmar mipui beiseina a siam thar nasa nia sawiin, "Sorkar lai kalphung thar kalpui mekte mipuiin beiseina sang tak an nei chho zel. HPC-te hnam movement kengtu, nunna tam tak chána lo beitute an ni bawk a, kan thawhhona hian mipuite nasa takin kan lama ṭang turin a chawk tho mek a ni," a ti.

Lalliansawta chuan, HPC nen sorkar an siam a nih chuan kum 2023-a an kan thawhhona thuthlungte an bawhzui zel dawn thu sawiin, "Kan sawi tawh angin HPC Headquarters pawh Sakawrdaiah ngei kan dah dawn," a ti a; kum 1994-a Memorandum of Settlement leh Sinlung Hills Council Act, 2018 tihlawhtling tura hma an lak dawn tuh leh SHC thuneihna (subject) mumal taka siam a nih dawn thu a sawi.

SHC-ah hian constituency 12 awm a awm a, kum 2019-a an inthlanpui hmasa berah khan MNF leh HPC inkawpin sorkarna an siam a ni.

ZPM LEH HPC THAWH DUN DAN TUR

☑ Bial 12 awmah ZPM-in bial 8 an chang dawn a, HPC-in bial 4 an chang ang.

☑ ZPM chan turte: Phuaibuang, Suangpuilawn, Vanbawng, Ratu, New Vervek, Sakawrdai North, Zohmun, Saipum.

☑ HPC chan turte: Khawlian, Sakawrdai South, North Ṭing­hmun, Saiphai.

☑ Sorkar an siam theih chuan thawhhona thuthlunga an ziah angin ministry ruangám chu ministry siam hunah party pahnihte'n an duang ang.