Older Persons Day hman a ni

Nimin October 1 kha kum upate ni, International Day of Older Persons a ni a, hmun ṭhenkhatah hman a ni. National Programme for Health Care of the Elderly (NPHCE) bultuma Central YMA Hall-a hman chu Health secretary Sangchhin Chinzah-in a hmanpui.

NPHCE huaihawta Upate Ni hmanna hi HFW principal director Dr Vanlalsawma'n a kaihruai a, khuallian Sangchhin Chinzah leh Mizoram Upa Pawl Gen.Hqrs president Nghaklianmawia ten thu an sawi. NPHCE state nodal officer Dr Catherine Lalmuanawmi'n 'Upat leh hriselna' tih thupui hmangin upate dinhmun leh an hriselna atana pawimawhte a tarlang.

Dr Catherine Lalmuanawmi tarlan danin, Mizoramah mi náwlpui dam rei zawng (life expectancy) a sang ve hret hret a, tuna Mizo mipa dam rei zawng chawhrual chu kum 68.3 a ni a, hmeichhia chu kum 73 vel a ni. Mizorama mihring cheng zawng zawng zinga 8% vel chu kum 60 chung lam an ni a, kum 80 chung lam an pung ve hret hret bawk.

Kum 2013 khan India ramah kum upa mi nuai 1,000 vel an awm a, kum 2021-ah chuan mi nuai 1,380 vel an tling tawh; kum 2050-ah chuan nuai 3,470 an chuang tura ngaih a ni. World Health Organisation chuan kum 2021-2030 inkar chu 'Decade with healthy living' atan a puang.

International Day of Older Persons hmannaah hian Aizawla MUP unit hrang hrang aṭangin MUP member 200 chuang an tel a ni.

Upate Ni hi Zemabawk leh Zemabawk North-ah pawh hman niin, bialtu MLA leh minister Lalthansanga'n a hmanpui a, Zemabawk MUP Rûn a hawng.

Lalthansanga chuan, Mizote'n upate hlutna an la phawk zo tâwk loa a lan thu sawiin, upate chu Mizote'n tun dinhmun an thlen theihna tura rim taka lo thawkte an nih thu leh chawimawi thiam a pawimawh thu a sawi a, "Thil tam tak lo tawng tawh leh inzir fing tawh an nih avangin an hnen aṭangin zir tur tam tak a awm. Upate hlutna hi kan chawi kân zel a ngai," a ti.

Upate chu ram leh hnam ro hlu an ni tih sawiin Lalthansanga chuan, "Sorkar pawh hian upate hamṭhatna tur kan lo aupui tawhte kha chak takin a bawhzui mek a, a hlawhtlinna kan hmuh thuai kan beisei," a ti a; upate chu an taksa uluk taka enkawl tur leh, ram leh hnam, an tu leh fate tana ro hlu ni zel tura ngaihtuahnate sêng zel turin a chah a ni.