Samagra leh IASE-in thuthlung ziak

Samagra Shiksha leh Institute of Advanced Studies in Education (IASE) chuan nimin khan School Education directorate conference hall-ah thawhhona thuthlung, 'Development of Vocational Guidance Module and Training of Secondary Schhol Teachers of Mizoram' an ziak.

Thuthlung ziahna hun hi Education minister Dr Vanlalthlana'n a hmanpui a, zirlaite harsatna zirbingna report a tlangzarh. Minister chuan, sikul zirtirtu sem rual loh vanga zirtirtu indaih lohna awm ṭhin chu pawi a tih thu sawiin, "A theih chin chinah sikul leh zirtirtu data en chian a, sem rual (rationalise) kan tum," a ti a; khawtlang mipui leh nu leh pate chu an khaw sikul dinhmun chauh ngaihtuah lo a, mi dang nen inkhaikhin ṭhin turin a chah.

Zirna lama Mizoram mamawh chu zirbingna (research) a nih thu sawiin Dr Vanlalthlana chuan, "Secondary school zirlaite harsatna zirbingna hmanga report, Identification of Learning Problems of Secondary School Students in Mizoram tlangzarh theih a ni hi a lawmawm. Mizoram Education Reforms Commission-in a taka a kalpui ngam tura kan buatsaih a ngai," a ti.

Education Minister chuan, sorkarna an chan chhungin data felfai tak hnutchhiah an tum thu a sawi a, "Kan ram zirnain kan ṭhatpuina tur a nih dawn phawt chuan beidawng loa hmalak zel kan tum. National Achievement Survey-ah kan performance a ṭhat theih nan zir bing a, theihtawpa hmalak dan turah ngaihtuahna seng turin ka sawm che u a ni," a ti bawk.