Bawlhhlawh leh thli thehthang danah rilru thar put a ngai - Dr Vanlalthlana

Aizawl Municipal Corporation (AMC) Ward-III Fai Inelna 2024 kalpui chu nimin khan SCERT Auditorium-ah result puanna leh lawmman semna hun hman a ni a, bialtu MLA Dr Vanlalthlana, minister-in hmanpuiin, bawlhhlawh leh êk thli thehthang danah rilru thar put a ngaih thu a sawi.

Inkhawm hi bialtu corporator C Lalchhandami'n a kaihruai a, Ward-III faina a ngaih pawimawh avangin inelna buatsaih a nih thu sawiin, "Faina hi Pathian thu nena thil kal kawp tlat a ni. Faina hian hriselna, dam reina leh nun hlimnate a ken tel," a ti.

Khuallian Dr Vanlalthlana chuan, bawlhhlawh leh êk thli thehthang danah mipuiin rilru thar an put a ngaia a hriat thu sawiin, "Tui luankawrah bawlhhlawh kan luan khawmtir hi a pawi a, Aizawl khawpui thli luan khawmna Chite lui en hian Mizote faina kawnga kan la hniamzia a lang chiang," a ti a, ṭhanharha hmasawn a ngaih thu a sawi.

Dr Vanlalthlana chuan, fûr laia leimin a awm fo chhan pakhat chu tui luankawr mumal lo leh luikawrte bawlhhlawh thehthangna atana hman nasat vang a nih thu a sawi a, "Tui luankawr mumal leh fai ṭha tak kan neih a ṭul. Plastic ûm leh polythene kan thehthang dante mumal zawk a kalpui a ngai. Faina hi mimal, chhungkua, khawtlang leh ram leh hnam hmel lanna a ni a, kan ngai pawimawh tur a ni," a ti.

Khua leh veng faina chu mipuiah a innghah thu sawiin Dr Vanlalthlana chuan, "Faina hian hriselna a keng tel a, ṭhangthar awm zel turte tan entawn tlak ni turin faina kawngah mi tinin ṭan kan lak a ṭul a, hnam ang pawhin faina kawnga ke kan pên a ṭul," a ti a; nalh taka inchei ringawt ringawt chu in leh lo leh khawtlang a fai si loh chuan zahthlak a chang mai ṭthin tih a sawi. AMC commissioner Joseph H Lalramsanga'n thu a sawi bawk.

Ward-III Fai Inelna hi chi thumah siam a ni a, PPP mode-a tih tur te, BKHP tih tur te, sikul fai inelna, veng chhunga faina kawnga mi entawn tlakte thlan chhuahte a ni.