CM-in 3D Dental Laboratory a hawng

Chief minister Lalduhoma chuan nimin khan Serchhip College-ah Serchhip District Hospital-a dah tur PM DevINE sum hmanga siam 3D Dental Laboratory thar a hawng. Serchhip District Hospital sak ṭhat mek a nih avangin 5G internet service awmna Serchhip College-ah laboratory bun rih a ni.

CM Lalduhoma chuan, 3D Dental Laboratory chu mi tam takin an chhawr ṭangkai a beisei thu sawiin, "Laboratory hi hmarchhak state tinah dah thar vek a ni a, AMTRON-te'n Guwahati aṭangin an thlung khawm ang a, training pawh anni'n an buatsaih thuai ang. He hmasawnna thar hi Industrial Revolution 4.0 an tih huanga mi, 5G connectivity service leh 3D printing technology huanga mi a ni," a ti a; 5G high speed internet hmanga telemedicine hmalakna dangte pawh ngaihtuah zel a nih dawn thu a sawi.

Chief Minister hian Serchhip District Hospital sak thar mek a tlawh a, "PGCIL-in an CSR cheng vbc 21 min pek bakah, central sorkarin a phal chin cheng vbc 50 kan pek belh ang a, cheng vbc 71-in District Hospital thar ṭha tak neih kan beisei," a ti. NEC Digital Tourism hnuaiah Serchhip ṭhalai mi 15 tun hnaiah IHM Delhi-ah ni 45 chhung hospitality training neihpui an nih thu a sawi bawk.

Chief Minister hian Serchhip District Hospital-ah Mobile ECG device leh drip monitoring system-te a hawn a; IHM Delhi-a ni 45 chhung hospitality sector training nei mi 15 hnenah certificate a hlan nghal a ni.