Lirthei chuan man bithliah zâwm lote hrem turin ngen

Mizoram Consumers' Union (MCU) chuan nimin khan thuchhuah siamin, lirthei chuan man (rate) chungchanga dan bawhchhetute dan anga hrem turin sorkar an ngen.

MCU chuan, tun hma aṭang tawhin sumdawnna atana mihring phurhna lirthei (public transport)-te'n State Transport Authority (STA)-in lirthei chuan man (rate) a siam zâwm duh lo an awm ṭhin chu pawi an tih thu a tarlang a, "Anmahni pawlin rate an siam angin sorkar dan bawhchhiain an service ṭhin a, hetiang hi mipui (consumer)-te dik lo taka rawkna a ni. STA rate siam anga tlan ṭha duh lote laka dan anga action lak mumal a awm ṭhin loh avangin lirtheia sumdawngte an pâwngpawrh zel ṭhin," an ti.

Tun hnaiah Lunglei-Aizawl maxicab-te STA rate siam anga an tlân duh lo chu pawi an tih thu tarlangin MCU chuan, "Lunglei DTO leh sorkar hmalakna hi MCU chuan ṭha a tiin, a thlâwp tlat a ni. Mipui harsa tak takte harsatna hrethiama STA-in rate a siam anga tlan ṭhin turin public transport-te kan ngen a ni," an ti a; sorkar chu mipui tana ding a nih ang ngeia dan bawhchhiate dan ang taka hrem ngam zel turin an ngen a ni.