KHAWTHLIR

No Littering Zone

Lunglei bawrhsap R Lalṭhazuala chuan Lunglei Chanmari Venga KFC dawr leh Civil Hospital, Lunglei inkar kawngpui dung chu bawlhhlawh paih lohna hmun, Lunglei No Littering Zone 1.0-ah a puang. Lungleia bawlhhlawh paih lohna hmun puan hmasak ber hi Urban Development & Poverty Alleviation department leh Clean Lunglei bultuma ruahman a ni a; LMC Ward-VII Committee, Chanmari Local Council, YMA, MHIP leh MUP-te nena thawhhona a ni.

SHC inthlanpui atan inbuatsaih

Sinlung Hills Council inthlan awm turah inthlanna felfai tak a awm theih nan nimin khan Returning Officer leh assistant returning officer-te tan Aizawl DC Conference Hall-ah training buatsaih a ni. Training hi election officer Samuel Zodinsanga'n a kaihruai a; RO leh ARO-te chu nomination file dan, vote thlak dan kalpui leh vote chhiar chungchanga hriat tur pawimawhte master trainer Lalchhanhimi leh Dr Lalchamliani ten an zirtir a ni. SHC inthlan hi kuminah neih tur a ni a, a hun tur puan a la ni lo.

Zu leh ruihhlo man

Assam Rifles sipaite chuan September 30, Thawhṭanni khan Zokhawtharah ram dang siam e-cigarette báwm 364, beer báwmpui hnih, zu ûm 109 leh tualchhung zu fûn 680 an man a, a vaiin Rs 14,25,564 hûa chhût a ni. Thawhṭanni vek khan Champhai Zote-ah mi pahnih hnen aṭangin heroin no 4 gram 24.6 an man bawk a, Rs 17,22,000 hûa chhût a ni.

Fimkhur turin chah

42nd Assam Rifles sipaite chuan October 1 - December 31, 2024 thleng, Pathianni tiam loin zing dar 7 aṭanga tlai dar 5 chhung an chán kahna hmun Serchhip Chanmari huam chhungah chán an kâp dawn a; Serchhip district bawrhsap Paul L Khuma chuan Serchhip mipuite fimkhur turin a chah.

Hmun thian fai

Gauhati High Court, Aizawl Bench chuan nimin zing khan faina beihpui thlakna, Swachhata Hi Seva campaign pualin an hmunah hun an hmang a, Gauhati High Court judge Justice Nelson Sailo leh Justice Marli Vankung ten an telpui. Gauhati High Court, Aizawl Bench hmunhmate an tifai a ni.

LMC BoC ṭhu

Lunglei Municipal Council (LMC) Board of Councillors chu nimin khan LMC pisaa BoC Hall-ah an ṭhukhawm a, chairman Lalzuithanga'n a kaihruai. Property tax chungchangah sorkar dan ding laiin a ruahman sa 3.42% floor rate chu an pawm a, sorkarah Gazetted Notification tura thawn ni se, an ti. Age factor hnuaia ram ruakte chu Land Revenue & Settlement department-in chhiah an lak avangin telh loh ni se, an ti bawk.

Faina kawngzawh

Faina beihpui thlâkna, Swachhata Hi Seva campaign pualin nimin khan Hnahthialah District Education Office bultumin faina kawng zawh, 'Cleanliness Rally/Prabhat Pheri' huaihawt a ni. DEO pisaa thawkte leh Hnahthiala high school leh higher secondary school zirlaite leh zirtirtute an tel a, Electric Veng community hall aṭanga Hnahthial H/S thleng kawng an zawh a ni.

Cultural Fest

Urban Development & Poverty Alleviation department chuan September 30, Thawhṭanni khan Keifang Venghluia YMA Zawlbukah Swachh Bharat Cultural Fest an buatsaih a, Saitual SP Pukhraj Kamal Gupta-a'n a hmanpui. Swachh Bharat Cultural Fest hi Saituala UDPA officer Dr Albert Vanlalliantluanga'n a kaihruai a; Saitual College-a Zorun Cultural Club-in hnam lâm leh zai an entir a, Saitual SP-in thu a sawi a ni.