KHAWTHLIR

September 23, Nilaini thleng khan Synod Mission Board (Mizoram Synod) hnuaia missionary zingah Covid-19 vei mi 20 hmuh chhuah a ni tawh. Mi 20-te hi mipa pariat leh hmeichhia 12 an ni a, an zinga 11 chuan enkawlna hmun an chhuahsan tawh a, mi pakua enkawl mek an ni.

Nimin kha National Service Scheme (NSS) Day vawi 51-na a ni a; he ni pual hian zirna-in hrang hranga NSS unit-te’n thisen unit 44 an pe. Region Higher Secondary School, Lawngtlai NSS-in Lawngtlai District Hospital-ah unit 14, Kolasib College NSS-in Kolasib District Hospital-ah unit 13, Lunglei Civil Hospital-ah Lungleia HATIM NSS unit-in unit 11 leh Leitlangpui HSS NSS-in unit 6 an pe a ni.

Mizoram Milk Producers’ Co-operative Union (MULCO) chuan, Fodder Development Project hnuaiah MULCO hnuaia bawnghnute chhûngtute chawikan nan leh bawng chaw harsatna phuhrûkna atan bawngchaw (silage) siamna tur leh dahṭhatna tur hmanrua, a  channa kháwl leh mamawh dangte an sem. Thil semte hi bawng vulhtu mi 30 hnenah pek a ni.

Directorate of Women & Child Development director Vanlalpianpuii chuan State Resource Centre for Women hmalaknain State Referral Hospital (ZMC)-a Covid-19 vei hmeichhiate tan sanitary pad, hrûkpuan, hmunhma phuh thianghlimna, châkkhai leh pawisa eng emaw zat medical superintendent Dr HC Laldina hnenah nimin khan a hlân.

State Referral Hospital (ZMC)-ah nimin khan Covid-19 vei pakhat dah luh a ni a, chu nen chuan hripui vei vangin SRH-ah mi 47 enkawl mek a ni. Mi 47-te chu ICU leh SICU-a awm pakhat ve ve leh Isolation Ward-a awm mi 45 an ni a, harsatna lian tham nei an awm loh thu, SRH-ZMC Bulletin chuan a tarlang.