Plastic sawngbawlna tur hawn a ni

Public Health Engineering (PHE) department hnuaia vantlang thianghlimna lama hma latu, Water and Sanitation Support Organisation (WSSO) bultuma Aibawk rama plastic bawlhhawlh sâwngbàwlna tur siam chu nimin khan WSSO director HC Lalnunzira'n a hawng.

Sorkar laipuiin Swatch Bharat Mission hnuaia ruahmanna a siamah thingtlang faina lama hmalakna chu PHE department kutah a awm a; SBM (Gramin) kaltlangin páwna inthiar awm lohna hmun ni tura hmalak niin, chumi hnuaiah chuan kum 2017 khan Aizawl district chu páwna inthiar awm lohna open defacation free (ODF) district-ah puan a lo ni tawh.

SBM(G) hnuaia hmalak chhun­zawmna atan plastic bawlhhlawh senghawi lam chu WSSO-in a bawhzui a, plastic bawlhhlawh sâwng­bawlna, Plastic (Waste) Re­source Management Centre (PMRC), Aibawk ruahman a ni. Aibawka PMRC hi Mizorama district zingah a awmchhun a ni rih.

PMRC hmunhma chu Aibawk khawtlangin an hmantir a, kum 2019-a bul ṭan niin, kuminah siam zawh a ni. Plastic bawlhhlawh lak khawmte ṭâwn khawmna kháwl leh a her sawmna kháwl a awm. Aibawk leh a chhehvel khua aṭangin plastic bawlhhlawh quintal 18 chuang lak khawm a ni tawh a, chu'ngte chu a ṭàwn khawmna kháwl hmangin quintal 9 vel tàwn a ni tawh.

Water and Sanitation Support Organisation hotute sawi danin, plastic bawlhhlawh lâk khawm tura tih a nih rualin, ṭàwn khawm rem lo leh plastic ni lo eng emaw zat, paih leh ngai awm ṭhin a, chu'ng tihralna tur pawh siam tel a ni.