Kum 2005-06 aṭanga 2024-25 chhungin Taxation-in Rs 76,68,07,15,232 a hmu

Mizoram sorkarin August 23, 2024-a List of Departments aṭanga a paih a, Finance department hnuaia a dah tâk Taxation department chuan sorkar kum 2005-06 aṭanga kumin (2024-25) August thla thleng khan chhiah Rs 76,68,07,15,232 (vbc 7,668.07) a hmu a, chu'ng zinga 61.52% chu Goods & Services Tax (GST) aṭanga hmuh a ni.

Taxation department website-a GST, profession tax, sales tax, entertainment tax, entry tax leh thil dang aṭanga sorkarin kum tina chhiah a hmuh dan, annual achievement-a a lan danin, sorkar kum 2005-06 aṭanga kumin (2024-25) August thla thlenga chhiah Rs 76,68,07,15,232 hmuh zinga Rs 47,17,67,77,610 (vbc 4,717.67) chu GST aṭanga hmuh a ni a, chhiah hmuh zawng zawng aṭangin 61.52% a tling. Chhiah hmuh tam berna dawttu sales tax aṭangin Rs 26,98,67,69,606 (vbc 2,698.67) hmuh a ni a, hmuh zawng zawng aṭangin 35.19% a ni.

GST aṭanga chhiah lak hi kum 2017-18 aṭanga kalpui a ni a, kum sarih leh thla nga chhungin Rs 47,17,67,77,610 (vbc 4,717.67) hmuh niin, Mizoram sorkarin Taxation department kaltlanga chhiah a hmuh tam berna a ni. Kum khat ang zela chhûtin sorkar kum 2017-18 aṭanga 2023-24 inkarah kum tin GST aṭanga chhiah hmuh a pung.

GST kalpui ṭan kum 2017-18 khan GST aṭangin Rs 1,65,77,19,950 (vbc 165.77) hmuh a ni a, GST aṭanga chhiah hmuh tawh zawng zawng aṭangin 3.51% a ni. GST hmuh tam ber kum 2023-24 khan Rs 9,70,25,49,016 (vbc 970.25) hmuh a ni a, GST aṭanga hmuh tawh zawng zawng aṭangin 20.57% a tling.

Sorkar kum kal mekah April-August, 2024 chhung khan GST aṭangin chhiah Rs 4,28,00,57,760 (vbc 428) hmuh a ni a; kumin thla nga chhunga chhiah hmuh hi GST kalpui a nih aṭanga hmuh tawh zawng zawng aṭangin 9.07% a ni.

Kum 19 leh thla nga (April 2005 - August 2024) chhung khan sales tax aṭangin chhiah Rs 26,98,67,69,606 (vbc 2,698.67) hmuh a ni a, Taxation department-in kau hrang hrang aṭanga chhiah a hmuh belhkhawm vbc 7,668.07 aṭangin 35.19% a tling. Sales tax aṭanga chhiah hmuh tam ber kum 2016-17 khan Rs 2,93,08,59,426 (vbc 293.08) hmuh a ni.

April 2005 - August 2024 chhung vekin profession tax aṭangin chhiah Rs 2,38,21,63,163, entertaiment tax aṭangin Rs 6,71,50,335, entry tax aṭangin Rs 6,19,70,962 leh thil dang aṭangin Rs 58,35,995 hmuh a ni bawk.

Kumin 2024-25 kal mekah April-August thla chhung khan chhiah Rs 5,05,72,88,932 (vbc 505.72) hmuh a ni a; chu'ngte chu GST aṭangin Rs 4,28,00,57,760, profession tax aṭangin Rs 5,57,04,248, sales tax aṭangin Rs 72,14,36,134, entertainment tax aṭangin Rs 20,000 leh thil dang aṭangin Rs 70,790 a ni.